Kisah Bunyi Sarina

palui-56Parak satangah tahun Abah Palui kada manjinguk anak wan cucunya nang bagana dikuta. Rasa dandaman jua sidin, apalagi lawan cucu sidin nang pahalusnya.

“Kaya apa habar ikam Lui, adakah pina paubahan gawian?” ujar kuiatan nang laki rahatan badudukan di muka tipi.

“Ulun tatap haja maojek bah ai. Amun musim katam, ulun umpat maambil upah mangatam, tapi amun ada borongan manukang, ulun bagawi manukang,” ujar Palui manyahuti kuitannya.

“Untung ikam banyak baisi kabisaan, jadi lancar ja rajakinya,” ujar nang kuitan.

“Wayahini bah ai amun kada kada pintar kita bausaha, kada kawa hidup,” ujar Palui himung.

“Sukur am kalu ikam wayahini sudah baubah,”

“Aku cuma mamadahi haja, balajar matan wayahini mangumpulakan, jangan habis sabakas. Jangan lagi babulik ka kampung mahulunakan kuitan bila kada baduit.”

“Inggih bah ai, tapi gasan napa jua pian baisi banyak kabun, mun kada gasan anak cucu pian,” ujar Palui.

“Bujur haja Lui ai. Cuma ingatakan, harta kada pacangan dibawa mati. Amun ikam bisa bacari, mangumpulakan itu kawa gasan anak ikam batarusan. Sakaligus gasan mambari contoh anak buah ikam supaya bisa mandiri, kada tatarusan bagantung wan baharap kuitan,” ujar abahnya mamadahi.

Rahatan asik bapanderan, tadangar bunyi sarina. Takajut kuitan Palui mandangar bunyi manginging nyaring banar. Langsung sidin bukah ka muka bakuciak.. “Api… api…! kamandahan… kamandahan!” ujar sidin maambil batu lalu mamukul katihang listrik.

Mandangar bunyi lonceng lawan kuciakan kuitan Palui, urang kampung bukahan kaluar rumah sambil mambawa ember.

“Dimana api Lui? Dimana ?” ujar Tulamak manakuni Palui.

“Aku kada tahu jua nah, kuitanku bakakajutan sidin bakuciak api sambil mamukuli tihang listrik,” ujar Palui kahiranan malihat kalakuan abahnya.

“Dimana apinya bah?” ujar Palui. Nang kuitan jua bingung.

“Aku tadi mandangar bunyi sarina, bunyi sarina kabakaran kalu Lui?” ujar nang kuitan bapadah.

“Hi…hi… Bunyi sarina nang pian dangar tadi bunyi gasan manandaakan masuk magrib matan masigit raya, tanda wayahnya babuka puasa bah ai, kadanya ada kamandahan pang,” ujar Palui hanyar sadar wan kalakuan abahnya.

“Ooooo… Cucuk haja pang sakalinya, kuitan Palui hanyar suah mandangar bunyi sarina matan masjid raya,” ujar Garbus wan Tulamak tatawan

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>