Kisah Dirujuk ka Ulin

palui-41“Ikam mandangar habar lah Bus?” ujar Tulamak manakuni Garbus.

“Habar nangapa Mak, panting banar kah?” ujar Garbus.

“Palui masuk rumah sakit. Inya kacilakaan samalam,” ujar Tulamak mamadahi.

“Bujurankah Mak? Amun kaya itu ayu kita elangi,” ujar Garbus.

“Nah, tabarungan itu si Tukacil datang. Kita bawai jua,” ujar Tulamak. manunjuk Tukacil nang hanyar datang. ”Umpat kalu ikam Cil?” ujar Tulamak.

“Hi-ih aku umpat, aku hanyar mandangar jua kisah Palui,” ujar Tukacil sakalinya tahu jua.

Lalu bubuhanya batiga tulakan bataksi manuju rumah sakit langsung manuju kamar rawatnya si Palui.

“Uma ai bubuhan ikam bariput-riput salang mambawakan makanan, diilangi gin syukur,” ujar }alui malihat kakawanannya datang.

“Kaya apa luka ikam Lui?” ujar Garbus.

“Alhamdulillah Bus ai, mulai bakurang, pamulaan haja nang sakit banar.”

“Untung haja masih banyak nang baik Lui ai, asal jangan urat nang sabuting tu ha pagat,” ujar tukacil manyambung.

Amun urat itu nang pagat, bisa manjanda umanya iya kada Lui?” ujar Tulamak lihum maniring lawan bini Palui.

“Ujar habar ikam handak dirujuk ka ulin, tapi kada mau. Bujurkah Lui?” ujar tulamak manakuni.

“Ikam kada salah Mak ai, aku ini limbah kacilakaan, makanya aku bakaraskada hakun,” ujar Palui manjawab.

“Kanapa kaya itu Lui? Satahuku amun urang manyuruh ka ulin artinya dukter di sini kada sanggup manangani atawa paralatannya nang kadada. Amun handak baik lalu dirujuk ka ulin sana,” ujar Tukacil hiran.

“Aku kada paham jua nah lawan pamikiran ikam tu Lui ai, disuruh baik malah bapadah manyakiti,” ujar Garbus manambahi.

“Pukuknya kada hakun aku,” ujar Palui mangaras.

“Kanapa Lui ? ujar Tulamak batakun.

“Buhan ikam hakunlah limbah sakit awak kacilakaan, lalu dirujukakan ka ulin lagi? Ngarannya kada tadua kalilah sakitnya?” ujar Palui manarangakan.

“Tadua kali sakit napanya Lui,” ujar Garbus kada paham.

“Dasar pambabal, dirujukakan ka ulin tu sakit kada?” ujar Palui manakuni Garbus.

“Nang waras gin kada hakun,” ujar Palui manambahi.

“Aku paham sudah,,, paham banar, ha..ha..ha…” ujar Tulamak tatawa mangalakak.

“Kanapa ikam malah tatawa Mak?” ujar Tukacil hiran.

“Palui ini salah pangartian, tapi inya kada kawa disalahakan jua. Dikira Palui dirujuk ka ulin tu dihantupakan ka ulin. Padahal maksud dukter dibawa karumah sakit ulin di banjar sana,” ujar Tulamak hanyar paham.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>