Kisah Iwak H

palui-49Bini Palui kada nyaman jua malihat lakinya pina kauyuhan bacari kada talihat hasilnya. Makanya tunggal gamatan inya mangumpulakan duit barian Palui kulihan maujik. Imbah cukup hagan modal lalu ai inya bapadah ka Palui.

“Ui abahnya… hakunlah pian maulahakan rumbung halus haja, ujar Julaiha bini Palui manakuni lakinya.

“Gasan napa rumbung? handak bajualankah ikam?”

“Inggih abahnya ai, ingat kalu pian bahari katuju ka warung ulun makan nasi kuning,” ujar nang bini maingatakan kisahnya bahari wayah badapat.

“Hanyar aku ingat, aku jatuh cinta karna karancakan makan nasi kuning lawan lontong ulahan ikam. Ayu ja amun ikam ada niat bajualan lagi, kaena kuulahakan wawarungan di muka rumah,” ujar Palui kahimungan bininya mau bausaha.

“Mudalnya kaya apa?” ujar  Palui manakuani pulang.

“Ada ai… kada banyak pang tapi cukup haja gasan mamulai bausaha,” sahut nang bini.

“Kaina kutambahiakan umanya ai, tabarungan ada jua baisian tabungan sadikit.”

Matan baisukan sampai kamarian, Palui sibuk maulahakan warung halus gasan bininya bausaha bawarungan nasi kuning. Subuhnya inya umpat bangun sungsung mangganii bininya bamasak wan mambungkusi nasi kuning.

Jam anam baisukan, warung bini Palui buka. Kada lawas datangan urang manukaran tamasuk bubuhan Garbus wan Tulamak.

“Napa babungkus kartas lui, kada badaun? ujar Garbus manakuni.

“Wayah ini mancari daun pisang ngalih banar bus ai, labih praktis pakai kartas,” ujar Palui mamadahi.

“Aku iwaknya ayam haja,” ujar Tulamak mamilih-milih mancari iwak ayam.

“Ada ai iwak ayam, cari nang tulisannya A,” ujar bini Palui sambil maulahakan banyu teh.

“Barataan tulisannya hurup H, kadada nang bahurup A?” ujar Garbus jua kabingungan.

“Kanapa abahnya pian tulisi H sabarataan? Urang dilainakan tulisannya bila Ayam tandai wan hurup A, Haruan tandanya H, hintalu tandai wan T artinya telor ,” ujar nang bini jua hiran limbah maitihi katulisan batanda H baratan.

“Aku kaingatan H itu iya Haruan, Hintalo, lwak Hayam, jadi mulainya H baratan,” ujar Palui marasa salah.

“Kamahiran panderan dibawa ka nasi bungkus,” ujar nang bini kasarikan, tapaksa mambukai bungkus nasi gasan mamariksai iwaknya

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>