Kisah Iwak Hanyar

palui-42Sudah saminggu dirawat di rumah sakit, Palui balum dibulihakan bulik karna panyakitnya pina masih barat haja. Karnanya inya makin muyak apalagi makanan dibatasi banar, banyak pantangan.

“Duk, pabila aku bulih bulik?” ujar Palui manakuni dukter wayah ada pamariksaan baisukan.

“Mustinya sudah kawa haja bulik asal sampiyan disiplin. Tapi karna kada disiplin maka panyakitnya pina balum bakurang,” ujar dukter manyahut.

“Disiplin nang kaya apa duk, samunyaan sudah kuturuti, makan ubat, makan bubur, makan tahu tempe, hintalu dan wan kada parnah mamakan nang jadi pantangan,” ujar Palui.

“Panyakit sampiyan ini sudah kumplikasi, mamarlukan istirahat nang banyak, jangan banyak bagarak, baranai haja di paguringan, bujur-bujur istirahat. Istilahnya, istirahat total,” ujar dukter.

Imbah dukter kaluar ruangan maka masuk parawat nang kebetulan parawat hanyar matan Jawa maantari ubat-ubat nang harus dimakan.

Lalu Palui batakun: “Sus umpat batakunlah, siang ini makannya iwak napa?” ujar Palui batakun.

“Siang ini ikannya enak, ikan gabus goreng,” ujar Suster manjawab dalam bahasa Indonesia.

“Wah, waahhh… pasti cagar kuat aku makan karna iwaknya adalah ikan gabus goreng. Pasti nyaman iwak hanyar ini,” ujar Palui karna hanyar mandangar. “Iwak ikan gabus goreng,” ujar Palui maulangi.

Siangnya datanglah bubuhan petugas maantari makanan gasan makan siang. Makanan dalam baki batutup serbet. Imbah petugas kaluar lalu Palui basiap-siap handak makan. Dibukanya serbet panutup sambil maitihi makanan di atas baki.

“Iwak ikan gabus goreng,” ujar Palui maitihi irisan iwak itu lalu mangibit handak marasani.

“Eee… inikah nang ngaran ikan gabus goreng?” ujar Palui. “Kukira tadi ngaran iwak hanyar kaya ciken kentuki, sakalinya… iwak ikan gabus goreng itu adalah iwak haruan basanga nang kaya di banua jua,” ujar Palui kakalahan. Tapi walaupun inya marasa kalah nyatanya habis haja sapiring jubung karna sudah bamingu-minggu ini iwaknya tatap haja tahu tempe wan gangan bayam hambar kada bauyah

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>