Kisah Kahilangan Ipuk

palui-5Sabulan Palui madam bacari gawian ka Banjar maninggalakan anak bininya. Akhirnya imbah dapat, anak wan bininya itu dibawanya jua ka Banjar.

“Ikam ding ai  kalu handak ka pasar jangan bajalan batis kaina uyuh karna pasarnya jauh,” ujar Palui manuduhi bininya.

“Ulun katuju babica haja kak ai,” sahut bininya.

“Babica itu lambat, apalagi jalannya banyak nang rusak wan macet,” ujar Palui.

“Kalu kaya itu ulun naik taksi kuta haja,” ujar bininya.

“Kalu naik taksi, dibaca bujur-bujur jurusannya supaya kada tasalah babuat. Kaina ikam sasat,” ujar Palui.

Karena saban hari ka pasar maka bini Palui banyak baisi kapatuhan hingga kada marasa asing lagi. Suatu hari wayah bulik matan pasar bini Palui gagarunum dan manyumpah-nyumpah.

“Napa maka pina gagarunum dan galu banar ding,” ujar Palui managur bininya.

“Ulun kahilangan,” sahut bininya.

“Kahilangan napa? Apakah kahilangan tutukaran?” ujar Palui.

“Ulun kahilangan ipuk. itu ipuk nang hanyar ditukar dan didalamnya ada duit, KTP,” ujar bini Palui.

“Makanya kupadahakan hati-hati karna di pasar banyak cupet,” ujar Palui.

“Perasa ulun, hilangnya kada di pasar tapi wayah naik taksi. Jadi hilangnya di dalam taksi,” ujar bini Palui.

“Dimana ikam ma andak ipuk itu,” ujar Palui.

“Kaya biasa jua, ipuk itu ulun sisipakan di dada, di sasala susu, jadi rasanya aman banar. Wayah itu panumpang taksinya hibak banar sampai bakakajalan,” ujar bini Palui.

“Kira-kira pabila gugurnya? Apakah wayah handak naik taksi atawa wayah sudah sampai,” ujar Palui.

“Ulun kira kada mungkin tagugur. Hanya wayah di taksi itu ulun rasa ada tangan nang mahahar dan mamusut susu ulun babarapa kali. Karna rasa nyaman dan galianan maka tapaksa ai ulun biarakan haja. Eee…sakalinya wayah turun taksi  dan handak mambayar ungkusnya tanyata ipuk ulun  sudah kadada lagi, sudah hilang,” ujar bini Palui pina takutan batarus terang mangisahkan kajadian itu.

“Kalu kaya itu bila ka pasar jangan naik taksi lagi, bajalan batis atawa babica haja supaya aman. Jangan sampai ada urang lain nang mahahar susu ikam lagi,” ujar Palui sarik manggarigit karna bininya sakalinya katuju jua digawi urang.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>