Kisah Mabuk Baojek

palui-57Pahaji Jain tamasuk nang panyugihnya dikampung Palui. Saban tahun sidin naik haji. Biarpun sugih kaya itu, sidin urangnya baik banar, katuju bawakaf ka masigit, lawan rancak jua bakumpulan urang kampung. Sidin kada sombong lawan harta, tatap haja katuju manulungi urang nang kasusahan.

“Aku handak mamotokopi nah. Kawakah ikam Lui maantarakan aku ka toko Ijul satumat,” ujar pahaji Jain handak umpat baojek Palui.

“Kawa banar pahaji ai, ulun tungguikah langsung?” ujar Palui.

“Kada usah Lui ai, tabarungan aku handak mailangi kuitan Ijul satumat, ada nang di urus,” ujar pahaji Jain langsung babuat.

“Rajakiku hari ini manarik pahaji,” ujar Palui bakisah lawan kakawalannya limbah babulik ka pangkalan.

“Barapa dibari sidin Lui, pasti balabih kalu?” ujar Tulamak.

“Bujur banar Mak ai, sidin manjulung Rp 20.000, padahal kasitu tarikan kita biasanya Rp 5.000 haja,” ujar Palui wayah aku handak maangsuli sidin kada mau maambil angsulannya itu.

“Ngalih mancari urang kaya sidin, padahal sidin banyak baisi mutur lawan sapida mutur, tatap haja hakun ba ojek lawan buhan kita,” ujar Garbus.

“Aku bakuliling dulu lah,” ujar Tuhirang nang matan tadi manalinga panderan kakawalannya.

Sakitar satangah jam, pahaji Jain bulik matan rumah kuitan Ijul manumpang ujek Tuhirang.

Tapi kanapakah babaya babayar dan turun matan ojek Tuhirang sidin langsung muak-muak.

“Kanapa pian pahaji bamuak-muak turun matan ojek Tuhirang?” ujar Palui manakuni.

“Kaya apa kada muak Lui ai, aku kada tahan sudah manahani di sapida mutur tadi,” ujar sidin bapadah.

“Pian garingkah, nyaman kami bawa ka rumah sakit nah,” ujar Garbus jua.

“Aku kada garing Bus ai, wigas haja.”

“Bujur Bus ai, tadi sidin baojek lawan aku sigar haja,” ujar Palui kahiranan.

“Pian rancak haja naik pesawat, naik turun mutur, kanapa jadi baojek Tuhirang sampai bamuntah-muntah? ujar Tulamak bingung.

“Amun baojek buhan ikam tadi aku kada suah jua bamuntah-muntah, tapi limbah naik ojek Tuhirang tadi aku kada tahan lagi,” ujar pahaji mamadahi.

“Kanapa pahaji, padahal ulun mambawanya biasa haja,” ujar Tuhirang.

“Ampun maap Rang lah, tapaksa aku bungkar… Talinga ikam babau banar curiknya, makanya aku muntah,” ujar pahaji pina manjalujuk.

“Ha.. ha, jara am pahaji naik ojek Tuhirang,” ujar Tulamak tatawa limbah tahu kajadiannya.

“Rupanya Tuhirang kacar jua mandangar Palui dibari pahaji Rp20.000.”

“Jaka tahu kalu ikam handak manyaluk pahaji tadi aku tangati Rang ai,” ujar Garbus
manumpalak Tuhirang.

“Makanya Rang ai, babarasih wan baharum-harum dahulu sabalum tulak bagawi tu. Kalu kita barasih, urang katuju wan kada jara umpat kita,” ujar Palui umpat manumpalak

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>