Kisah Saparu Saurang

palui-38Warung bini Palui bujur haja halus, tapi cukup haja gasan manapal kabutuhan hari-hari amun Palui kada dapat paruyek batukang. Saking raminya maka baistilah bubuhan kakawalan Palui kaya Garbus wan Tulamak baulah pangkalan gasan maujek, baparakan lawan warung Palui itu.

“Hanyar haja aku kaganangan umanya ai, sudahkah ikam batatukar ka pasar? Tampulu ada bubuhannya, kalu handak minta antarakan,” ujar Palui sambil manunjuk Garbus wan Tulamak nang lagi mahadangi tumpangan.

“Astaghfirullah…., kada ingat sama sakali ulun abahnya ai,” ujar bininya. “Hakunkah pian haja nang batatukar ka pasar? Ulun masih haur pang”. Palui akur haja, lalu inya basiap-siap handak ka pasar gasan batatukar kaparluan bininya bawarung.

“Siapa nah nang ma antarakan aku ka pasar?” Palui manakuni bubuhannya. “Aku satumat haja batatukar, jadi hadangi satumat di pasar kaina”.     “Amun lawas Garbus haja gin Lui ai, aku masih handak santai dulu,” sahut Tulamak. Garbus lalu badiri lalu bajalan tuju ka sapida muturnya.

“Barapa tambangnya bulang-bulik Bus?” ujar Palui sambil bajalan bairingan lawan Garbus.

“Duapuluh ribu haja gin Lui ai, lawan papadaan pang,” jawab Garbus sambil mamuruk hilim. Palui kada manyahut tanda inya akur, lalu babuat di belakang Garbus langsung buhannya tulakan.

Kada sampai sajam datang sudah Garbus wan Palui matan pasar, imbah turun pada sapida mutur Palui manjulung duit sapuluh ribu lawan Garbus. Malihat duit jujulungan Palui masam muha Garbus.

“Tambangnya duapuluh ribu, Lui ai…jadi masih kurang sapuluh ribu lagi”.     Lihum Palui mandangar, lalu inya manjalasakan. “Mulai tulak tadi sampai datang ka sini pulang kita badua haja kalu bakandaraan?”.

“Hi ih,” lakas Garbus manjawab. “Aku di muka, ikam di belakang,” ujarnya lagi kada mau kalah.

“Supaya adil tambangnya kita bagi dua alias saparu saurang, Bus ai… Aku sapuluh ribu ikam sapuluh ribu, lain jakanya aku bakandaraan saurangan haja, hanyar aku hakun bayar duapuluh ribu,” ujar Palui sambil maninggalakan Garbus nang masih tanganga kada paham. Tulamak wan bini Palui kalikikan katawa malihat Garbus tahinip di sapida muturnya.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>