Kisah Bingka Manohara

palui-71Salawas bulan puasa ini Palui katuju banar tulak ka pasar wadai. Hakun haja inya bajajal di tangah urang banyak. Bila inya kadada di paojekan parak kamarian, baarti cari haja di pasar wadai, dalas tulak surangan digawinya jua.

Kakawalannya saurang taumpat bingung malihat kalakuan Palui wayah ini bilang rancak banar ka pasar wadai.

“Nah… Itu nah urangnya, baiknya kita takuni langsung haja,” ujar Garbus sambil manunjuk ka Palui nang hanyar cangul.

“Napa maka tunjuk-tunjuk ka aku, kalu pagat talunjuk,” ujar Palui pina curiga.

“Kami hiran tahun ini ikam rancak banar ka pasar wadai, napa garang digawi? “ujar Tulamak.

“Bubuhan ikam baarti katinggalan barita, di pasar wadai wayahni ada bajual bingka Manohara,” ujar Palui bakisah.

“Kaya apa pulang nangaran bingka Manohara,” ujar Garbus bingung.

“Dari pada panasaran, umpati aku ka pasar wadai,” ujar Palui.

Di pasar wadai, banyak banar urang nang bajualan, banyak lagi nang batutukar. “Mana Lui nang ngarannya bingka manohara tu, aku rasa handak umpat manukar,” ujar Tulamak kada sabar.

“Ayu kita baparak,” ujar Palui mambawai mamaraki ka nang bajual bingka.“Kaya apa bingkanya? mantap kada?” ujar Palui manakuni.

“Amun bingkanya dasar bulat baisi wan mungkal-mungkalnya, nang manjaganya liwar lagi,” ujar Tulamak pina titik liur.

“Liur buhan ikam ni kada baubah, puasa lawan kada sama haja,” ujar Garbus manunpalak kakawalannya.

“Nang ngaran liur Bus ai kada kawa didustai, iya kada Mak?” ujar Palui kakarinyum.

“Akur banar Lui ai, amun kaya itu aku manukar sabigi,” ujar Tulamak.

“Pian kada manukar kah a’a Palui?” ujar nang bajual bingka managur.

“Amun aku sudah pasti manukar, tapi bulik tatap umpat aku kalu?” ujar palui lihum.“Pasti a’a ai ulun umpat pian,” ujar nang bajual bingka supan-supan.

“Bah, tadahulu Palui manggendong manoharanya, tapakalah kita,” ujar Tulamak limbah tahu nang bajual bingka manohara sudah bajanjian lawan Palui.

“Wajar haja Mak ai, Palui sudah labih satangah bulan manyalumur,” ujar Garbus mambawai Tulamak bulikan.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>