Kisah Mukena Kalambu Buruk

palui-74Parak hari raya tadi, Palui wan bininya bulikan ka banua handak bahari raya wan abah uma wan mintuhanya. Karena handak bamalam babarapa malam maka tapaksa banyak bawaannya. Di samping baju salawar inya mambawa jua sekadar ulih-ulih.

Malam pamulaan dan kadua inya bamalam di rumah abah umanya. Malam katiga kaampat hanyar bamalam di rumah mintuhanya. Di kampungnya ini Palui pina rajin banar sembahyang, kada tatinggal waktu.

“Aku himung banar wan sampiyan abahnya ai, rajin pada biasa sembahyangnya,” ujar bini Palui.

“Bulik ka kampung ini aku marasa sanang banar, tarasa banar suasana puasanya, jadi aku katuju banar kawa baibadat dan manggawi sembahyang pas waktunya,” sahut Palui. “Mudahan kaina imbah kita bulikan ka kuta, aku kawa maubah kabiasaanku,” ujar Palui. “Subuh ini kita umpat sembahyang bajamaah di masigit umanya ai,” ujar Palui mambawai bininya.

“Ayu ja, ulun akur haja,” ujar bininya lalu langsung masuk kamar guringan.

Rupanya karna kauyuhan maka guringnya lalap banar. Apalagi malam itu dingin banar karna hari baribisan. Makanya parak tuntung azan di masigit hanyar tabangunan.

“Lakasi umanya baudhu, kaina kita kada sawat umpat baimaman,” ujar Palui manggasak bininya.

“Ayu ja abahnya ai, talambat atawa tadudi sadikit kawa haja di masbuk,” sahut bininya sambil bagagasakan mamuntal mukena.

“Hari masih baribisan umanya ai, lakasi kita balaju bajalan supaya jangan kabasahan,” ujar Palui.

“Alhamdulillah sawat haja abahnya ai, pas urang tuntung qamat,” ujar bininya langsung bagabung ka syaf bibinian.

Wayah imam maangkat takbir hingga mambaca fatihah, bini Palui masih sibuk wan puntalan, lalu langsung mambuka sajadahnya. Inya gerasah-gerusuh mancari muhara mukenanya handak mamasukakan ka kapalanya. Tapi bulang balik dicarinya kada tadapat jua karna puntalannya ganal banar. Karna kada kawa mamakai mukenanya, maka langsung haja kain itu dipuntalakannya ka-awak, lalu umpat sembahyang baimaman hingga tuntung zikir dan doa.

“Abahnya, ui abahnya hadangi ulun” ujar bini Palui wayah handak bulikan.

“Ayu lakasi pacul mukenanya,” ujar Palui. “Tapiii… tapi kanapa maka mukena ikam pina bapulilit ka-awak dan pina batali-tali?” ujar Palui bingung apalagi inya tacium bau pimpijit.

“Massa Allah…. ikam kada mamakai mukena umanya ai, nang ikam pakai itu adalah kalambu buruk nang batuyuk di higa lamari. Ikam tasalah bawa umanya ai,” ujar Palui mangalakak tatawa mananawakan bininya.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>