Kisah Sambahyang Nomor Dua

Parak palui-66saminggu Palui kada kalihatan umpat tarawih di langgar. Bubuhan Tulamak wan Garbus kada paham lawan kalakuan kawalnya itu.

“Itu Paluinya Mak. Cubai pang ditakuniakan kanapa maka jarang umpat tarawih di langgar,” ujar Garbus manunjuk Palui nang hanyar cangul.

“Kanapa ikam jarang tarawih ka langgar Lui, napa nang digawi dirumah?” ujar Tulamak manakuni Palui.

“Aku hauran banar Mak ai, kada sampat lagi ka langgar,” ujar Palui.

“Haur napanya, kulihat ikam kada kalihatan sibuk?” ujar Garbus.

“Di rumah tu banyak ja nang digawi Bus ai.”

“Ikam ni baalasan haja supaya kada sumbahyang ka langgar, dasar handak babulik kalu kalakuan kaya bahari,” ujar Tulamak manuduh.

“Nah, bubuhan ikam ni kada pacaya lawan aku. Manurut guru agamaku bahari, sambahyang tu nomor dua haja, makanya aku wayahini di rumah haja,” ujar Palui.

“Hau, bakaji ilmu dimana ikam Lui? Guru nang mana nang mamadahi sambahyang nomor dua?” ujar Garbus kahiranan mandangar pandapat Palui.

“Rupanya ini panyabab Palui kada suah lagi umpat sambahyang ka langgar, rupanya inya sudah takaji ilmu sasat. Parlu kita laporakan ka bubuhan depag atawa MUI Bus ai,” ujar Tulamak.

“Aku kada takutan dilaporakan ka buhan depag atawa MUI atawa ka polisi sakalian, sabab aku mancontoh guru agamaku bahari,” ujar Palui mangaras.

“Amun manurut guru Jain Lui ai, sambahyang itu tihang agama. Bararti itu nang paling utama, kadanya nomor dua, ikam salah kaji,” ujar Tulamak mangancang.

“Guru Jain bujur haja Mak ai tapi guru agamaku gin kada salah jua,” ujar Palui malamahi.

“Lalu kanapa ikam manomorduakan sambahyang?” ujar Garbus kahiranan.

“Bubuhan ikam suah sakolah lah? nah manurut ikam sambahyang nomor barapa?” ujar Palui babalik batakun

“Dimana-mana guru mamadahi sambahyang paling utama, kadanya nomor dua,” ujar Tulamak karas.

“Pantas haja agama ikam bahari dapat lima. Ingat kada wan rukun Islam? Sambahyang itu pasti nomor dua, nomor satunya mambaca dua kalimat syahadat, bujur kada?” ujar Palui kakarinyum sambil bajauh.

“Bujur jua lah, kita maka tadi mangancang-ngancang. Sakalinya rukun Islam nang dipanderakan,” ujar Garbus wan Tulamak kakalahan.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>