Kisah Ampih Sakulah

palui-82Musim masukan sakulah samalam Palui tadangang imbah malihat duit sumbangan nang musti dibayar. Kalu dihitung-hitung jumlahnya parak satangah jutaan.

Apalagi Palui baisian anak talu ikung, tapaimbai ja pulang sabarataan masuk sakulah. Sawat basamut jua utak Palui maada-adaakan duitnya. Apalagi panghidupan saraba ngalih kaya wayah ini. Tapi Alhamdulillah, ada haja rajakinya. Warung Palui rami haja hari-hari, jadi kawa haja inya manyakulahakan anak buah.

Nang kasian banar Tulamak. Tuhuk inya mancari utangan kasana-kamari, gasan manungkarakan sapatu, tas, buku, wan mambayar duit sumbangan hagan anaknya nang hanyar masuk sakulah. Sampai inya basung-sung mandapati Palui di warungnya, handak mainjam duit. Kabalujuran di situ ada jua Garbus nang lagi asik mambaca surat kabar.

“Lui, minjam duit pang lima ratus ribu, adalah?” ujar Tulamak pina mambari maras muha.

“Gasan napa Mak?” sahut Palui sambil manyurung kupi lawan Tulamak.

“Gasan bayaran sakulah anakku Lui ai,” jawab Tulamak sambil maharu kupinya.

Garbus nang masih mambaca surat kabar umpat jua bapandir, “Jar bubuhan Disdik, kakanakan nang hanyar masuk kadada sumbangan napa-napa, Mak ai.”

“Tahu jua, Bus ai. Anakku nang handak daptar ulang dipintai sumbangan,” sahut Tulamak.

Paharatan bubuhannya bapandiran, datang si Amat, nang handak turun sakulah.

“Bah, tikinakan pang raput ulun. Hari ini handak ulun kumpul, Bah ai,” ujarnya sambil manjulung raput lawan Palui.

“Malihat pang, Lui, raput anak ikam,” ujar Tulamak imbah Palui sudah manikin raputnya. “Wah! Hibat banar anak ikam, Lui lah. Tumatan kalas satu sampai naik ka kalas ampat, titir inya haja tarus nang rangking satunya. Cuba ikam lihati, Bus,” ujarnya sambil manjulung raput si Amat lawan Garbus.

“Rugi ai anak Palui kalu kada pintar. Iya kalu Mat,” sahut Garbus maambung. “Paling kada, pintar pandir barang, kaya abahnya,” ujar Garbus lagi. Palui nang sudah hapal pahatian bubuhannya, kada mau tamakan ambungan Garbus.

“Kalu kaya itu, ampih haja sudah ikam sakulah, Mat ai,” bagasut Palui bapandir pina banyaring. Takajut kakawalannya mandangar, tamasuk jua si Amat. Bilut muhanya handak manangis. Sangkanya Palui sarik lawan inya.

“Hau. Kanapa jadi kaya itu, Lui?” ujar Garbus hiran. “Aturannya ikam himung wan basukur baisian anak pintar. Anih ikam ni, Lui ai.”

“Hi ih,” sahut Tulamak. “Urang nang kada sakulah haja handak sakulah, dalasan bautang. Tapi kanapa maka ikam handak maampihi anak nang sudah sakulah, padahal ada haja duitnya.” Palui takarinyum malihat buhannya pina tagang.

“Kalu Amat masih sakulah, kasian kakawalannya nang lain, kada sawat marasai rangking satu,” bamandak satumat Palui manyirit ka Amat. “Tapi kalu Amat ampih sakulah, baarti kakawalannya kawa marabuta kan rangking satunya,” ujar Palui pulang baagak. Tapakalah banar Tulamak wan Garbus. Amat maka am lihum, kada jadi manangis

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>