Kisah Kucing Makan Tikus

palui-79Palui bujur haja kada tamat sakulah, tapi kalu sual ilmu mahitung wan mambaca kada kalah jua lawan urang. Kalu sual bahitung duit inya kada kawa dibunguli, mambaca napa haja lancar banar, napa tiap hari nang diingkut koran.

Makanya wayah pambakal manawari umpat sakulah kajar paket A inya kada hakun umpat. Ujarnya inya sudah pintar, nang panting bisa mambaca wan kada kawa dibunguli urang.

“Aku umpat Lui ai karna imbah tuntung umpat pakit ini dapat surat tamat SD,” ujar Garbus himung.

“Napa nang ma ulah ikam himung Bus?” ujar Palui.

“Nang ma ulah aku himung wan rajii umpat balajar karna guru-guru bibinan, anum-anum wan langkar-langkar. Karna gurunya anum wan langkar itulah maka aku rajin maitihi sidin maajar,” ujar Garbus.

“Ikam itu sabujurnya kada mata karanjang lagi Bus ai, tapi karanjangnya, baisi anak sudah talu ikung bapadah bujang tarus,” ujar Palui.

“Kada salah aku kalu, tampulu payu wan urang handak, masuk akal kan?” ujar Garbus.

“Ayu ikam ku uji, kalau bujur-bujur balajar bisalah mambaca wan ba ulah kalimat?” ujar Palui.

“Pasti bisa asal jangan ngalih-ngalih” ujar Garbus.

“Nah susun kalimatnya dari kata-kata kucing-tahi-tikus-makan” ujar Palui.

“Sutil banar… dangarakan jawabanku, tikus makan tahi kucing, tahi tikus makan kucing, tahi kucing makan tikus” ujar Garbus kumat-kamit mambulak-balik susunan kata-kata itu.

“Ayu Garbus tamatan pakit A, manyusun kalimat haja tapuntal-tapulilit, sa umur hidupku balum biasa mandangar: kucing makan tahi tikus atawa tikus makan tahi kucing, apalagi tahi kucing makan tikus wan tahi tikus makan kucing” ujar Palui manggalak manawaakan Garbus.

“Eeeeeeeee…sakalinya ngalih jua Lui lah?” ujar Garbus.

“Makanya sakulah itu jangan hanya maitihi muha wan burit guru,” ujar Palui.

“Lalu kaya apa jawaban nang bujur Lui?” ujar Garbus handak banar tahu karna samua jawabannya disalahkan Palui.

“Jawaban nang bujur Bus ai adalah: kucing makan tikus” ujar Palui.

“Lalu dimana ma andak tahinya?” ujar Garbus.

“Tahinya itu badudi, hadangi sahari atawa dua hari pasti kucing itu bahira mangaluarkan tahi,” ujar Palui batandik marasa manang.

“Dasar Palui ini kada kawa dilawani, mahalabiu tarus” ujar Garbus kakalahan.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>