Kisah Pagawai PTT

palui-78Wayahini banyak bubuhan nang sarjana, nang sakulahnya tinggi masih kada baisian gawian. Bahkan wayah panarimaan pagawai samalam nang dicari kada sabanding wan nang mandaptar.

Padahal pamarintah maharapakan bahwa lulusan sakulah tinggi harus bisa maulah lapangan gawian saurang alias bawiraswasta.

“Itulah salahnya bubuhan kita. Bila tamat sakulah lalu musti handak jadi pagawai, padahal wayahini justru pamarintah mangurangi pagawai nageri kita,” ujar Palui wayah bapander wan Garbus.

“Kada kawa disalahakan jua Lui ai, lantaran handak bausaha saurang kadada baisian mudal. Jadi tapaksa maharap jadi pagawai,” ujar Garbus.

“Wayahini ada anjuran supaya kita bausaha, bawiraswasta wan harus mandiri. Sabujurnya sual mudal kawa diatur, maminta karidit wan bank,” ujar Palui.

“Kada gampang mainjam karidit wan bank karna banyak syarat wan jaminannya,” ujar Garbus.

“Gampang haja Bus ai, buktinya wayah pamilu tadi bubuhan kawa mainjam matan bank gasan dana kampanye,” ujar Tulamak nang hanyar datang manyahut.

“Sakalinya banyak nang tatilantang jua kalu,” ujar Palui manyindir bubuhan nang kalah kampanye.

“Ikam Lui wayahini bagawi napa, umpat mangaridit di bank juakah?” ujar Garbus.

“Aku wayahini sudah jadi pagawai PTT,” sahut Palui.

“Ooo … jadi ikam bakantur di kantur pos wan kantur tilpun itulah?” ujar Tulamak.

“Bahanu di situ, bahanu di pasar, bahanu di palabuhan, di taksian, di mana-mana haja asal jadi duit,” ujar Palui.

“Kalu jadi pagawai kada kawa ka hulu ka hilir, ka pasar atawa ka palabuhan,” ujar Garbus.

“Itulah untungnya jadi pagawai PTT,” ujar Palui himung.

“Jadi ikam pagawi PTT kaya dukter itukah, dukter PTT,” ujar Tulamak pina mulai paham.

“Pas banar tangguhan ikam itu Mak ai, pagawai PTT adalah singkatan Pegawai Tidak Tetap, artinya sarabutan ramak rampu, ka hulu ka hilir, ka barat ka timur asal jadi duit wan halal,” ujar Palui mambuka rahasia gawiannya nang kada manantu.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>