Kisah Kada Parlu Baijin

palui-84Palui hanyar haja manukarakan anaknya sapida mutur. Karna kada kawa manukar nang hanyar tapaksa inya manukar nang satangah pakai alias nang bakas. Nang panting masinnya masih tukcer. Ibarat manusia mangawini nang balu itu bapahala, ujar si Palui baparinsip.

Siangnya Palui manyinggahi Garbus. Rancananya handak mambawai bajajalanan sambil mancubai sapida mutur anaknya itu.

“Bus… ui Garbus, umpat kah bajalanan sambil mancubai sapida mutur anakku ini. Kamana ikam handak, apakah ka Gambut atawa ka Jambatan Barito?” ujar Palui manawari Garbus.

“Ayu ja. Kalu kaya itu kita ka Gambut haja mancari tapai, salajur mailangi bakas gandak ikam,” ujar Garbus kahimungan.

“Ayu lakasi babuat wan pisit-pisit baingkut ka pinggangku,” ujar Palui manyuruh.

“Ikam maanggap aku kampungan haja, disuruh baingkut. Aku sudah biasa maujek, nang baingkut ka pinggang itu bibinian,” ujar Garbus. Lalu Palui mangacak gas manjalanakan sapida muturnya. Sampai di kilometer tiga ada razia, Palui disuruh bamandak.

“Stop pak, ka pinggir pak! Ada pamariksaan surat-surat,” ujar Pulisi sambil hurmat wan Palui.

“Ayu turun Bus, ada pamariksaan pulisi. Ikam kadada kasalahan napa-napa kalu Bus?” ujar Palui manakuni Garbus.

“Bulih saya lihat surat-suratnya?” ujar Pulisi.

“Sampiyan mancari surat napa? Sapida mutur ini hanyar saminggu ditukar,” ujar Palui.

“Nang panting surat ijin mangamudi,” ujar Pulisi.

“Sapida mutur ini adalah sapida mutur anakku, aku mamakai ini hanya handak mancuba masinnya haja. Karna abah wan anak maka kada parlu bapadah atawa baijin apalagi basasuratan, kami sarumah saling mamparcayai haja. Salain itu sapida mutur ini aku jua nang manukarakannya,” ujar Palui.

“Surat ijin mangamudi,” ujar Pulisi.

“Sudah kusambat tadi aku mamakai sapida mutur anakku ini kada parlu basurat ijin-an. Masa pulisi kada parcaya, ini nah KTP-ku,” ujar Palui.

“Lui………… uiii Palui. Ikam kada paham, pulisi itu mancari surat ijin mangamudi nang bangaran S.I.M,” ujar Garbus.

“SIM itu napa Bus?” sahut Palui bagamat.

“SIM itu rebuwis,” ujar Gabus.

“Oooooooo…… rebuwiskah?” ujar Palui paham sambil pina manyasal karna inya kada baisian.

“Ini nah, suratnya pangganti sementara,” ujar Pulisi manjulung surat tilangnya manyuruh Palui mambayar ka loket.

“Kalu kaya itu kita kada jadi ka Gambut Bus ai, duit gasan manukar tapai tapaksa tapakai mambayar tilang,” ujar Palui sadih.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>