Kisah Takamihi Tunggul

palui-85Di kampungnya Palui wayah ini bilang kada aman lagi, haur tiap hari urang ada bahabar ada nang kamalingan. Tamasuk min-tuhanya si Palui saurang hanyar tadi kahilangan duit lawan tv. makanya badasarakan rapat di rumah pambakal maka diputusakan kalu jaga malam bagiliran diadaakan pulang.

“Cil, ikam lawan Amat nang runda bakuliling badahulu, kaina hanyar giliran Surawin wan Tuganal,” ujar Palui bapander lawan Tukacil.

“Giliran ikam pang pabila?” ujar Tukacil gagarunum.

“Karna aku kapala kumandan maka giliranku kaina pandudian,” ujar Palui sambil mambagi kartu ka Garbus, Tulamak wan Tuhirang.

“Lakasi bagi kartunya Lui,” ujar Garbus. Asik ai imbah itu bubuhannya main remi.

“Aku cung satumat, mulai tadi kahandakan bakamih, handak banar sudah kaluar,” ujar Tuhirang bukah ka padang kadap.

Dihadang lima manit si Tuhirang balum babulik jua.

“Lawasnya Tuhirang ngini,” ujar Garbus sudah kada sabar.

Aku curiga timbul inya bulik guring ka rumah.

“Aku parmisi nah, handak bakamih jua,” ujar Palui mangalunyur.

“Tajangkit Tuhirang kah Lui ikam jadi umpatan bakamih jua,” ujar Tulamak.

Si Palui kada manyahut lagi, inya sudah bukah jauh handak mancari pangamihan.

Di kadap Palui malihat tunggul bawarna hirang.

“Nah aku bakamih disitu gin ada tunggul,” ujar Palui dalam hati. Palui nang sudah kada kawa lagi manahani langsung mamacul ka salawar imbah itu cuurrrrr…..

“Aaaiiiii!!!!” ada nang bakuriak matan tunggul nang di kamihi Palui, takipik Palui.

Langsung inya bukah saling lajuan, dikira takamihi hantu. Hiiiii… Bus, aku tadi takamihi
urang halus,” ujar Palui katakutanan.

“Makanya Lui ai kalu bakamih jangan sambarangan, kalu takamihi urang halus bisa-bisa burung ikam hilang,” ujar Tulamak. bahancap palui manjapai ka banda ampunnya itu. “Alhamdulillah
ada haja,” ujar Palui himung.

Kada lawas datang Tuhirang pina katakutanan jua. “Kanapa ikam Rang? Kanapa ikam babasah-basah?” ujar Garbus.

“Aku dikamihi urang halus Bus ai,” ujar Tuhirang sambil malapas bajunya nang basah tadi.

“Ai.. kanapa jadi sama lawan Palui, inya takamihi urang halus, sadang ikam dikamihi urang halus?” ujar Garbus. “Dimana garang tadi bakamih?,” ujar Tulamak.

“Di padang kadap situ nah,” ujar Tuhirang mamadahakan wadahnya.

“Hau… kanapa jadi sama awan aku?” ujar Palui. “Jadi aku tadi takamihi ikam lah Rang? Maap, Rang lah aku kada tahu kukira ikam tunggul, sualnya hirang warnanya,” ujar Palui.

“Uuuuuu…. Ikam kah sakalinya nang mangamihi aku, pantas haja babau jaring,” ujar Tuhirang langsung manyapuakan baju basah bakas kamih tadi ka muha Palui. Galu ai lalu malam itu, tatawaan mangalakak sabarataan.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>