Kisah Katuju Dikaramputi

“Di antara kita ini hanya ikam haja Mak ai nang pintar banar bakawan,” ujar Garbus.

“Kada jua Bus ai. Aku, ikam wan Palui sama haja pintar bakawan,” sahut Tulamak.

“Maksudku ikam pintar banar bakawan wan bibinian apalagi bibinian nang anum-anum. Kalu Palui itu pintar jua bakawan tapi wan bubuhan nang tuha-tuha,” ujar Garbus.

“Kabalujuran haja Bus ai,” sahut Tulamak.

“Kulihat kalakuan ikam lenggang-lenggok pina lamah liku, bisa pura-pura marayu, bisa manyanangakan hatinya, pintar mamusut pipinya,” ujar Garbus.

“Kalu kaya itu ikam manyamakan aku wan bubuhan waria itulah Bus?” ujar Tulamak pina tasinggung.

“Ucapan Garbus itu bujur haja Mak ai. Artinya ikam bisa marasuki bubuhannya hingga banyak rahasia nang bisa ikam palajari,” ujar Palui umpat mamuji.

“Palajaran napa nang kawa diambil dan kawa dituruti?” ujar Garbus manakuni Palui.

“Bibinian ini paling ngalih dikatahui rahasianya. Ibarat paribahasa ‘biar bungkas di landau kada mau mambuka rahasianya’. Artinya biar tabarubut hujung tikar kada hakun bapadah,” ujar Palui

“Bujur dan pas banar ujar ikam itu Lui ai, sasuai pangalamanku,” ujar Tulamak nang rapat wan bibinian mangakui.

“Aku hiran jua Mak ai biarpun bibinian itu ngalih dikatahui rahasia-rahasianya tapiiii… kada sadar bahwa bubuhannya itu katuju haja dikaramputi,” ujar Palui lihum.

“Dikaramputi kaya apa Lui? Napa buktinya?” ujar Garbus manggasak handak tahu.

“Banyak buktinya Bus ai. Ampun maaflah, kalu tasalah tangguhanku ini. Banyak bibinian batianan kadada lakinya, banyak bibinian hakun dikaramputi ulih lalakian nang bapadah bujang sakalinya dimadu jadi bini anum. Banyak bibinian mandarita atawa bunuh diri karna dihianati cintanya. Kaya itu jua bini hakun haja dikaramputi laki bapadah bagawi lembur sakalinya bagandakan wan sekretaris dan banyak lagi cuntuhnya,” ujar Palui.

“Kalu kaya itu Lui ai kada karna bibiniannya nang hakun dikaramputi, tapi karna lalakiannya nang jadi raja pangaramput,” ujar Tulamak manangkisakan kada hakun bubuhan bibinian nang disalahakan.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>