Kisah Sugih Wan Saraba Ada

Palui dasar paling katuju mamakalah bubuhan Tulamak wan Garbus. Saban hari gawiannya mahual haja, tapi mun kadada inya kada rami tupang. Rasa hilang sabuting tulang rusuk bubuhannya kahilangan Palui. Palui jua ngarannya, mudalnya banyak jua gasan mangalahakan kawalannya. Amun sakali dikalahi, inya mambalas dua talu kali. Bahimat tu pang inya mancari kalamahan urang.

“Amun kita rancak bagaya, kita bisa awit anum,” ujar Palui mamanderi Tulamak wan Garbus.

“Awit anum ai, tapi ikam karancakan mahapak atawa mangalahakan kami,” ujar Tulamak.

“Aku tu bagaya haja Mak ai, jangan di masukakan ka hati,” ujar Palui.

“Kada kawa Lui ai gayaan tu masuk ka hati,” ujar Tulamak takarinyum.

“Nah, bapintar ngarannya Tulamak, kada kaya Garbus pina kada ubah-ubah,” ujar Palui manyirit ka Garbus.

“Amun pintar kada disini Lui ai, sudah jadi urang sugih,” ujar Garbus tasinggung dipadahi kada pintar.

“Nah kaya ini haja, buhan ikam hakunnya sugih kah atawa hidup saraba ada haja?” ujar Palui pulang.

“Aku hakun sugih,” ujar Garbus langsung manyambar.

“Amun aku disuruh mamilih, aku hakun saraba ada, artinya kada bakurangan, ada tarus baisi,” ujar Tulamak.

“Amun sugih tu Mak ai, nyaman hidup, banyak baisi harta,” ujar Garbus.

“Ikam pang nang ampun tatakunan mamilih napa Lui?” ujar Tulamak.

“Aku kada mamilih napa-napa,” jawab Palui.

“Hau kanapa kaya itu?” ujar Garbus kahiranan.

“Amun Garbus mamilih sugih, artinya saraba balabihan hidup, liwar sugih tu pang,” ujar Palui.

“Bujur kalu Mak, bujur aku kalu sakali ni,” ujar Garbus kahimungan.

“Ampun tulamak bujur jua, biar hidup pas-pas an tapi saraba ada, artinya baik jua, mutur ada, rumah ada, sapida mutur ada, duit ada, tamasuk panau ada, kunat ada, burut ada, huban ada, pokoknya saraba ada tu pang,” ujar Palui lihum.

“Pamulaan pina baik sambatan ikam, ujungnya nang kada nyaman,” ujar Tulamak kakalahan. Garbus mangalakak tatawa mandangar ujungnya mahambat.

“Bujur pilihannku kalu mak, hakun sugih,’ ujar Garbus marasa manang.

“Garbus dasar bujur jua, sugih mutur, sugih rumah banyak, sugih bini, lawan sugih kunan, sugih panau, sugih burut lawan sugih…..!” Palui tasatup bapander limbah muntungnya ditutup Garbus lawan tangan. Tulamak lucut jua manawaakan Garbus nang kakalahan

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>