Kisah Takutan Katulahan

Palui katuju banar baharaguan hayam jago nang gasan saungan. Hanyar tadi Palui manukar hayam jago matan julak Tambi. Biar haraganya larang tatap haja inya tukar karna ujar inya basaung hayam itu adalah hubi inya matan lagi anum.

“Ikam tahu lah Lui, basaung hayam itu tamasuk judi,” ujar Tulamak mamadahi.

“Manyaung hayam nang dianggap judi itu bila kita bataruh duit, tapi bila atas dasar kesenangan kada dianggap judi,” ujar Palui baulah alasan.

“Tapi itu tatap haja kada baik, bila katahuan pulisi bisa ditangkap,” ujar Tulamak pulang.

“Bujur haja ujar ikam itu Mak ai, manyaung hayam kada bulih kalu katahuan tapi bila kada katahuan pasti aman-aman haja manyalurakan hobi,” ujar Garbus mangijipi Palui.

“Garbus ini umpat malawanakan Palui karna basaung hayam ini tamasuk gawiannya,” ujar Tulamak manyindir.

“Ayu Bus kita basaung. Ini nah aku mambawa hayam, ujar nang bajual hayam ini kada biasa kalah, pasti manang,” ujar Palui.

“Kada usah ba-agak Lui ai, balum tacuba wan hayam haraguanku. Ayu kita bataruh salawi ribu,” ujar Garbus manantang.

“Jangan cuma salawi ribu tapi lima puluh ribu,” ujar Palui.

“Saksiakan Mak, bila aku manang maka ikam dapat bagian,” ujar Garbus mambawai Tulamak nang anti basaung hayam.

“Aku kada umpat basaung hayamlah tapi hanya umpat manikmati hasilnya,” ujar Tulamak pina supan-supan.

“Ayu saksiakan,” ujar Palui malapas hayam jagonya nang pina mamburangsang wani banar.

“Siap malawan,” ujar Garbus malapas hayamnya.

Hayam Palui wan hayam Garbus saling bahadapan dan bapandangan saling maitihi sambil sama-sama handak mambintih. Eee… kada lawas bapapandangan hayam Palui bukah laju banar.

“Kanapa Lui maka hayam ikam kalah sabalum basaung?” ujar Tulamak mahapak hayam Palui.

“Di mana ikam manukar hayam itu Lui?” ujar Garbus.

“Aku manukar hayam itu matan julak Tambi,” ujar Palui pina sadih karna hayamnya bukah sabalum basaung.

“Hahahaaa… hahaa… pantas haja hayam ikam kada wani dan mangalah wan hayamku ini Lui ai, karna hayamku ini adalah abahnya hayam ikam. Jadi inya pasti kada wani malawan nang tuha, pasti cagar katulahan bakalahi sakatara-an,” ujar Garbus mangalakak tatawa mangacak duit taruhan mangalahakan Palui.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>