Kisah Babuka Kadundung

“Kamarian ini bubuhan ikam sabarataan kusaru karumah gasan buka puasa, salamatan saraba sadikit,” ujar Tulamak.

“Kalu kawal kantal nang maundang, apalagi gasan babuka puasa kami pasti datang,” ujar Garbus.

Kamariannya bubuhannya rapat duduk basila sambil baistigfar mahadang dauh babunyi, Tulamak pina sibuk kaluar masuk sambil mahitung undangan nang datang.

“Tangguhi Rang, kira-kira napa makanannya?” ujar Garbus.

“Kukira hayam masak habang karna kamarian tadi kariyukan bunyi hayam disumbalih,” jawab Tuhirang.

“Kukira pasti sup hayam atawa soto, nah lihati itu sudah disurung kicap bapipiringan,” ujar Garbus.

Kutangguh bujur kiraan ikam. itu nah kaluar pulang lumbuk parawit, sahut Palui. Imbah itu manyusul babarapa bilah lading wan kobokannya.

“Wah……tasalah tangguhan kita ujar Palui pulang. Amun balading makanannya pasti hayam atawa itik bapanggang,” ujar Palui mambujurakan tatanguhannya.

Parut asa makin lapar, makin galurukan mahadang susurungan lainnya. Sakalinya kaluar susurungan bapiring hibak baisi buah kadundung, ada nang masak pina kuning tapi banyak jua nang hijau masih mantah.

“Amun samunyaan sudah dapat, silakan haja makanan saadanya, itu nah dauh maghrib sudah babunyi ,” ujar Tulamak. “Dimaklumi hajalah kami tadi kada sawat batutukar ka pasar. Mamanya tadi ka pasar sakalinya hanya manukar dadak gasan umpan itik, inya kada ingat kalu malam ini ada basalamatan,” ujar Tulamak pina supan.

“Kami ini disaru gasan salamatankah atawa gasan bapapancukan,” ujar Garbus batakun sambil mamusut-musut parutnya.

“Makanya aku sakali lagi baribu-ribu minta maaf, susurungan buah kadundung tadi kuputiki matan batangnya nang rubuh. Makanya sayang dibuang-buang lalu kuamalakan kusadakahkan gasan babuka puasa ini. Amun bubuhan ikam handak mambarakat di balakang masih ada lagi talu bakul,” ujar Tulamak.

“Kami parmisi bulikan, parut asa maulas-ulas mamancuk kadundung rabah. Tulamak pamalar, handak baamal tapi kada hakun kaluar duit. Dasar Tulamak guldap alias gulu handap pamalaaaar… pangasiiiit……!”ujar bubuhannya.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>