Kisah Batal Samunyaan

Tulamak manyaru kakawalan paraknya, nangkaya Palui, Garbus, Tuhirang, Surawin, Tuhalus wan kakawalannya nang lain babuka puasa di rumahnya. Pukul satangah anam bubuhannya sudah bakumpul di rumah tulamak sambil bakikisahan ka hulu ka hilir mahadang dauh maghrib.

“Jadi imbah kaina babunyi paluit kita babuka puasa lalu sambahyang magrib bajamaah, imbah itu hanyar kita makanan ala kadarnya,” ujar Tulamak si tuan rumah.

“Kami akur haja, tasarah tuan rumah,” ujar Garbus.

“Kalu sambahyang magrib kaina siapa nang jadi imamnya,” ujar Tulamak batakun.

“Kukira kita sapakat haja pilihan kita kada lain wan ustadz kita si Palui,” ujar Garbus.

“Sabujurnya aku kada sangup jua jadi imam karna barat banar tanggung-jawabnya apalagi makmumnya harat-harat,” ujar Palui manyindir kakawalannya.

Kada karasaan kadangaran dauh buka puasa, lalu masing-masing babismillah mamakan kurma wan wadai bingka wan wadai amparan tatak. “Aku duduk-duduk basandar satumat handak ba-ruku karna asa pahit banar liur saharian kada maisap timbaku,” ujar Garbus.

“Ikam bulih haja ba-ruku Bus ai tapi jangan sampai tatinggal bamagrib,” ujar Tuhirang imbah inya tuntung qamat.

Palui jadi imam langsung maangkat takbir lalu diumpati nang lainnya. Tapi si Garbus masih mampaul maisap ruku, lalu ditagur Tulamak supaya lakasi umpat bajamaah. Karna digasak Tulamak maka Garbus capat-capat mamatii rukunya dan puntungnya nang masih baparu-paru diandaknya di talinga, lalu umpat jua maangkat takbir

Balum tuntung imam mambaca ayat, Garbus bakipuh kapanasan. Rupanya puntung ruku nang disapitakannya di talinga tadi balum mati banar. Karna kapanasan maka puntung ruku itu ditapaknya ampah kamuka lalu malacung. Malacungnya pas tamasuk kagulu baju imam si Palui. Akhirnya Palui kirik-kirik kapanasan karna puntung ruku nang masih banyala tadi sangkut di baju kausnya.

“Subhanalllah…… kanapa Lui maka ikam kirik-kirik,” ujar Tulamak managur karna kada sampai hati malihat Palui tatunduk sambil mangipas-ngipas balukuknya.

“Ini nah puntung ruku siapa tamasuk ka dalam bajuku,” ujar Palui nang tapaksa mambatalakan sambahyangnya.

“Puntung ruku-ku, tadi kukira sudah mati sakalinya masih ba-api,” sahut Garbus nang taumpat jua batal.

“Kalu kaya itu aku batal jua karna sawat bapander managur ikam Lui ai,” ujar Tulamak.

“Gara-gara puntung ruku Garbus kita batal samunyaan. Kalu kaya itu kita baistigfar minta ampun wan Tuhan dan kita ba-asa sambahyang magrib bajamaah,” ujar Palui mambawai kakawalannya.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>