Kisah Ngalih Mamayuakan

Banyak bakawan, dasar kadada ruginya. Ujar urang bisa manaikkan rajaki. Makin banyak kawan, makin banyak jua rajaki nang datang. Cuntuhnya si Palui, gara-gara banyak baisi kawan, inya wayah ini dibawai bagawi. Wayah ini, inya diparcaya manjagaakan toko nang bajual suku cadang sapida mutur.

Darwis, ngaran kawannya itu. Inya urang Jakarta nang handak mambuka usaha di Banjar. Palui diparcaya karna dianggap jujur. Garbus wan Tulamak gin dibawainya mangganii bajualan. Tapi, ada nang balain pada urang. Tuku Darwis ini, paling banyak manjual kampas rim. Ujarnya, di Jakarta kampas rim paling payu karna urang rancak tapakai gara-gara macit.

Imbah sabulan buka, sakalinya, kampas rim sadikit haja payu. “Bah, mun di Jakarta, sudah dua kali manukar baasa,” ujar Darwis mamadahkan wan Palui.

“Mun di sini, kampas rim dasar ngalih mamayu akan,” jar Palui manjawabi sakananya.

“Kanapa jadi nang kaya itu Lui,” jar Darwis nang sudah lihai babahasa Banjar.

“Nah, mun kanapa jadi kaya itu, ulun kada kada tahu jua. Jar urang, kampas rim dasar lapah mamayuakannya,” jar Palui kabingungan.

“Handak tahu lah, kanapa di sini kampas rim lambat payunya,” jar Tulamak umpat bapandir.

“Kanapa jar, kisah akan pang,” jar Darwis wan Palui batakun tapaimbai.

“Di sini, urang basapida mutur jarang manjajak rim, makanya am, lambat habis kampasnya,” jar Tulamak mangisah akan. Palui wan Darwis nang mandangar makin bingung.

“Ai mana buktinya, pina pananahunya ikam nih,” jar Palui.

“Iya am, pina panahunya, ada di surat kabar kah,” jar Darwis umpat panasaran.

“Kada usah lapah-lapah mancarii buktinya. Cuba bagana parak lampu habang. Lihati lampunya, habang kah, hijau kah, kuning kah, tatap ranjah tarus, kada basasatopan,” jar Tulamak.

“Kacuali ada pulisi mancungkung bajaga, hanyar pina tartib. Cubai batarus ditilangnya banar am,” jar Tulamak.

“Bah, baarti, aku salah parkiraan. Aku kira sama haja wan di Jakarta kandaraan rancak bagananya daripada bajalan,” jar Darwis.

“Mun kaya itu kita baganti usaha ai. Mun ada mudal aku baulah rumah sakit sagan urang nang patah batis, patah tangan wan patah sagala-galanya ai,” jar Darwis manambahi pamandirannya.

“Kanapa nang kaya itu, Wis,” jar Palui, Tulamak wan Tuhirang pina tapaimbai batakun.

“Biasanya, mun rancak malanggar lampu lalu lintas, rancak jua kacalakaan. Jadi, kada salah kalu mun aku handak baulah rumah sakit sagan urang patah batis, tangan wan kapala,” jar Darwis.

“Bah, pian nih, macam-macam haja, nang ini haja kada sing payuan, sudah bapikir itu. Tapi, bujur jua pang,” jar Tulamak.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>