Kisah Disasah Pulisi

Sudah baminggu-minggu Palui malajari bininya duduk babirangkang di goncengan sapida mutur, tanyata kada mau bisa karna sudah tabiasa naik sapida, duduk bahiring.

“Kanapa umanya maka pina ngalih banar balajar duduk babirangkang, kada bisa-bisa jua sampai lunyak guguling diulah cuntuh duduk babirangkang,” ujar Palui.

“Sudah tabiasa duduk bahiring abahnya ai, nyaman malihat kahiga dan sabalah tangan maragap ka pinggang sampiyan. Lagi pula duduk babirangkang di balakang sapida mutur kada baik karna kasihan nang di bawah. Maka sampiyan rancak baucap kada katuju nang longgar,” sahut bini pina ungah.

“Hari ini kita saruan ka wadah mamarina Tuhabuk di subarang sana, tajauh sadikit makanya kita basapida mutur,” ujar Palui mambawai bininya.

“Ulun akur haja abahnya ai tapi syaratnya ulun kada hakun duduk babirangkang di sapida mutur,” sahut bininya.

“Makanya tadi kusambat jalannya jauh makanya ikam harus duduk babirangkang,” ujar Palui.

“Ampun maaf abahnya ai, kalu saruan ka urang basalamatan pangantin itu harus babaju kabaya dan batapih bahalai, makanya kada kawa duduk babirangkang,” ujar bininya.

“Ooo… hiih-lah aku kada ingat umanya ai,” ujar Palui manyadari. Malihat bininya tuntung badandan, Palui nang sudah di sapida mutur langsung manyuruh babuat.

“Jangan tapi laju abahnya ai, kaina tahambur galungku,” ujar bininya.

“Hari pina maram makanya talaju sadikit umanya ai,” ujar Palui sambil mangarasi kacakan gas sapida muturnya.

Kada lawas imbah turun jambatan, Palui mandangar bunyi paluit pulisi.

Karna marasa balum baisi SIM, Palui makin bahimat mangacak gas. Pulisi manyasahinya sambil maniup paluit manyuruh bamandak.

Tapi Palui kada hakun karna takutan ditilang. Wayah di simpangan Palui tapaksa balambat dan ahirnya disuruh pulisi maminggir jalan.

“Maaf pak pulisi, ulun balum barebuwis, sadang diurus,” ujar Palui langsung manjawab walaupun balum ditakuni.

“Aku kada paharatan batugas marazia, tapi handak mamadahakan wan ikam bahwa bini ikam tadi tapulanting di parak simpang tiga sana karna tadi ikam kalajuan,” ujar pulisi lihum.

“Astagafirullah, rupanya biniku tagugur. Kukira tadi sampiyan mahaluki aku karna tahu aku kada barebuwis, makanya makin disasahi aku makin balaju” ujar Palui batarima kasih sambil bagamat babulik mancarii bininya nang tagugur matan sapida mutur karna duduk bahiring.

2 Responses to Kisah Disasah Pulisi

  1. ANWAR says:

    dsar lucu banar palui nee,,…wan bini nang di bawa kada ingat .hahahaha??????

  2. latif says:

    wkwkwkwkwkwkkwkwwwkwkkwkwkwkw………lucvuuuuuuuuuuuuuuuuuuuuuuu abisssss

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>