Kisah Kanyamanan

Palui badua laki bini rahat pusang banar mamikirakan Utuh, anak Palui, nang sudah sampai umurnya tagal kada sing kawinan. Tuhuk sudah Palui badua laki bini mamikirakan kaya apa caranya supaya Utuh hakun kawin.

“Sual calunnya abah kawa manyiapakan. Tinggal tunjuk haja ikam, nang mana handak. Atawa minta pilihakan abah kah,” ujar Palui mambuka pandir rahat dudukan di balakang rumah.
“Iih Tuh ai. Lakasi nah. Pilih nang mana nang ikam kahandaki. Nyaman kita batajak sarubung. Sual duit jujuran wan sagalanya kada usah dipikirakan,” ujar nang bini umpat bapandir.
Sama kaya nang sudah-sudah, nang ngaran si Utuh tu asyik wan gawiannya saurang. Inya asyik baulah gula habang. Kanapa kah inya bilang katuju banar wan gula habang.
“Parasa ulun kadada nang manisnya babinian di dunia ni ma ai dibanding wan gula habang. Parasa ulun kadada nang nyamannya bah ai binian di dunia ni dibanding gula habang,” ujar Utuh sambil bapuisi.
Manciling nang badua laki bini tu mandangar sasahutan Utuh.
Saminggu imbah bapandiran tu, Palui wan bininya kaya kaguguran durian runtuh. Mamrina Palui nang di pahuluan kawa mambisai Utuh supaya kawin. Kaya apa caranya kadada nang tahunya. Ayuha jar Palui, tampulu Utuh hakun kawin. Lawan babiniannya dicariakan mamarina Palui jua.
Saking himungnya, Palui batajak sarubung bilang rami banar. Mulai bawayang sampai bajajapinan. Sakampungan urang umpat himung. Utuh nang dikawinakan pina kada tapi lihum pang, biasa haja. Dalam hatinya tanyaman baulah gula habang dari pada batatay.
Pas malamnya. Utuh wan bininya masukan ka kamar. Kabujuran kamar pangantin tu bahigaan wan kamar Palui. Bilang liwar Palui badua laki bini tu, anak handak guringan hakun haja manalinga, nangapa nang dipandirakan wan dipaulah.
Parak sajam imbah itu, bininya Palui daur mandangar Utuh gagarunum di dalam kamar. “Bah, pinanya bini Utuh tu kasurupan. Napa Utuh pina mambaca alahula, alahula tarus. Cuba dangarakan,” ujar nang bini.
Palui lalu banahap ai mandangarakan. Galas diandaknya ka talinga imbah itu ditikapakannya ka tawing. “Dasar bujur umanya ai. Pina mambaca alahula tarus. Babacaan ayat kursi banar tu,” ujar Palui.
Setangah jam imbah tu ranai am. Taguringan buhannya. Sampai ayam batangkuuk partanda subuh hanyar kaluaran pada kamar pangantin tu handak sumbahyang subuh.
Rahat baudu, Palui wan nang bini bagamat mamaraki Utuh. “Napa Tuh, kasurupan kah bini ikam malam tadi jadi ikam baca ayat kursi tarus?” ujar Palui batakun.
Asalnya Utuh handak sarik sudah tahu kuwitannya manalinga, tagal inya langsung tatawa mangalakak. “Haha, ulun kada babacaan ayat kursi pang bah ai. Ulun kanyamanan. Ujar ulun tu kada Allahula pang, tagal ujar ulun malam tu kalah gula, kalah gula. Nyaman pada gula sakalinya,” ujar Utuh.

“Ham tiya. Ujarku jua. Jaka nyaman gula pada babinian kadada ikam pang di dunia ni,” ujar Palui gagarunum. Nang bini lucut manawaakan. Minantu Palui makalaham kada sing bunyian.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>