Kisah Baangkat Dangsanak

sipalui-24Si Palui takajut banar karna wayah nyaman-nyamannya guring siang, urang di higa rumahnya galu banar. Bagagas inya baluncat matan paguringan, manyasah napa nang ditumburakan. Sakalinya dilihatnya adingnya nang babinian lagi barungkup wan si Zubaidah anaknya Naif tatangga sabalah bahalat talu buah rumah.

Badadua barunggutan rambut sambil baguling-guling di tanah. Asa kada saimbang napa si Zubaidah awaknya lamak mungkal, sadang ading Palui awaknya halus. Lawas pang hanyar kawa Palui mahalat sampai galu sa-RT-an. Sawat jua Palui kana karukut wan kana tampar di muha.

“Sabar..sabar!” ujar Palui kukuciak mahalat. “Napa garang nang disualakan maka barungkup bahimat?” ujarnya sarik.

“Itu nah si Masnah, ading pian, marabuti gandak ulun,” ujar Zubaidah mahahing kasasarikan.

“Siapa nang marabuti? Ulun sudah lawas bagandakan wan inya,” ujar si Masnah kada mau kalah handak marungkau pulang. Untung Palui sawat mangacak tangannya.

“Siapa garang lalakiannya nang diparabutakan itu?” ujar Palui umpat sarik.

“Pacar ulun si Husin Jabuk, anaknya julak Ambran. Ulun sudah samingguan ini bapacaran wan inya. Inya jua bajanji sahidup samati wan ulun,” ujar ading Palui.

“Pangaramput si Husin Jabuk itu pacar ulun. Ulun jua sudah saminggu ini bagandakan wan inya,” ujar Zubaidah kada hakun kalah.

“Itu artinya bubuhan ikam badua sama-sama bungul, hakun dikaramputi lalakiannya. Artinya ikam badua sudah dicabangnya alias di sini bapadah cinta, di sana bapadah sayang,” ujar Palui sarik.

Kada lawas datang si Naif, abahnya si Zubaidah, tapaimbai wan katua RT. Si Zubaidah disuruh abahnya bulik. Kaya itu jua si Masnah disuruh Palui masuk rumah. Tapaksa Palui bapander balamah karna si Naif itu urangnya panyarikan jua. Untung ada katua RT nang kawa manyabari wan mambari jalan tangah. Imbah lawas bapander akhirnya ulih katua RT lalu didamaiakan. Pardamaiannya adalah diadakan salamatan tapung tawar dan disuruh ba-angkatan dangsanak.

Wayah acara tapung tawar dan ba-angkatan dangsanak itu si Masnah wan si Zubaidah ditamuakan, disuruh baragapan. Sakalinya bakakajutan Palui maragap si Zubaidah saling pisitan langsung diangkatnya. kukuciakan Zubaidah kabuliyangan. Si Naif sarik langsung mamukuli Palui. Nangkaya itu jua kaluarganya nang lain umpat jua manggarumuti mamukuli Palui sampai linyak. Ada pang lima anam ikung nang umpat manampar.

Tapaksa katua RT mangiyau bubuhan hansip gasan mananagakan situasi. Imbah ranai, Palui ditakuni katua RT:

“Kanapa maka ikam lancang banar maragap wan maangkat si Zubaidah nang lain muhrim ikam Lui?” ujar katua RT.

“Sasuai acaranya batapung tawar wan ba-angkatan dangsanak. Karna ading ulun awaknya halus kada kawa ma-angkat si Zubaidah nang lamak itu, maka ulun mangganti ading ulun. Ulun paraki Zubaidah, ulun ragap saling pisitan langsung ulun angkat,” ujar Palui takuringis.

“Salah ikam jua Lui ai, ikam kada paham. Ba-angkatan dangsanak itu artinya ma-akui badangsanak kadanya maragap wan ma-angkat kaya itu,” ujar katua RT lalu manyuruh Palui minta maaf.

“Biar haja tasalah wan babak belur tapi barazaki kawa maragap si Zubaidah nang lamak mungkal itu,” ujar Palui dalam hati sama sakali kadada marasa manyasal.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>