Kisah Asli Kambangnya

sipalui-33Pambakal Duan wayahini lagi bacari bibinian, maklum sidin sudah lawas saurangan karna ditinggalakan mati bininya. Sual bacari bibinian ini, sidin parcaya banar lawan Palui.

“Lui, cariakan bibinian. Aku tahu ikam urangnya pangawan wan banyak kawan kalu. Janda atawa balu kada papa jua, asal hakun aku ambil bini,” ujar Pambakal waktu tadapat Palui.

“Kabalujuran banar Pambakal ai. Ulun ada baisian kanalan janda. Sidin takanal sabagai janda kambang. Di kampungnya sidin takanal banar sabagai janda kambangnya kampung, samunyaan urang pasti tahu.”

“Bujuran janda kambangkah Lui, di mana kampung sidin? Ikam tahu saurang kalu, aku nangini hantu babinian jua sabujurnya, asal aku tahu rumahnya pasti kudatangi,” ujar Pambakal.

“Bujur… asli janda kambang pambakal ai, lamun pian ka sana, bapadah ulun nang manyuruh, sabab ulun sudah rakat bakawan wan sidin,” ujar Palui sambil manjulung kartas alamat si janda kambang.

“Tarima kasih banyak Lui lah, baik banar ikam wan aku. Ini nah duit lima puluh ribu, gasan ikam baulanja,” ujar Pambakal langsung bajauh.

Kaisukan harinya imbah bailang ka rumah si janda kambang, Pambakal kulilik ka sana ka mari mancari Palui. Imbah tadapat langsung haja sidin manyarik.

“Dasar panipu banar ikam nangini Lui ai, muha nangkaya simpang ampat nangitu ikam padahakan janda kambang. Cucuk ai ngarannya gin Bu’ut Parmatasari, pas haja pang lawan urangnya,” ujar Pambakal Duan manyumpah.

“Hauuww, sabar Pambakal jangan talalu manghina ciptaan Tuhan, muha pian gin babaya sangkut jua kalu,” ujar Palui manyabari Pambakal Duan.

“Maka ujar ikam sidin nangitu janda kambang kanapa muhanya nangkaya itu,” ujar pambakal magin manyarik.

“Sidin nangitu mimang asli janda kambang, karena gawian sidin sabujurnya bajualan kambang di pasar. Pian banar ai nang tasalah,” jar Palui pulang.

“Bah… iya am… diwaluhinya aku,” ujar Pambakal kakalahan sambil bajauh maninggalakan Palui nang takurihing saurangan.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>