Kisah Putik Sarundutan

sipalui-29Kalu wayah lagi anum rajin batanam, rajin maharagu insya Allah kita cagar kawa mamutik hasilnya. Kaya itu jua bila kakanakan kita lagi halus dilajari sambahyang, mangaji, umpat tadarusan maka bila sudah tuha pasti inya cagar candatan pasti kawa dibawa kaurang banyak. Ini artinya kita sabagai urang tuha jangan marasa muyak bausaha, cangkal-cangkallah karna hasil usaha kita itu kainanya pasti cagar dinikmati ulih anak cucu kita jua.

Palui dua laki bini tamasuk nang bauntung kawa manikmati hasil tanaman kayinya. Di higa rumah buah nangka sudah pina ganalan, langsat wan rambutan kada lawas lagi kawa diputik.

“Anu abahnya ai, samingguan ini liurku asa malalain. Aku kacar banar malihat buah rambutan nang dipinggir jalan tanaman aruwah kayi itu. Kawalah sampiyan manaikakan mamutik sarumpun dua,”ujar bininya.

“Bapadah ja bujur-bujur, apakah ikam sudah baliur dua,” sahut Palui.

“Tangguhan sampiyan bujur banar abahnya ai, ini barakat hasil gawian sampiyan jua,” ujar nang bini sambil manunjul awak Palui.Imbah mambujurakan kapuntalan tapihnya Palui mulai bakayukut manaiki batang rambutan nang babuah labat tapi balum masak banar, jadi harus bapilih mamutikinya.

“Pilihakan ulun buahnya nang ganal-ganal supaya nyaman manguyaknya,” ujar nang bini bakuriak.

“Sudah banyak rambutannya kajatui, tapi tulung pang putikakan rambutan nang kulitnya pina masak hirang itu,” ujar nang bini sambil manunjuk ka atas.

“Mana? Kadada rambutan nang habang hirang itu, samunyaan masih mantah. Kaina hadangi samaminggu kira- kira samunyaan sudah masakan,” sahut Palui.

“Itu, itu…. nah, ujar nang bini manunjuk, parak higa tapih sampiyan ada sarundutan pina mahirang. Pasti nyaman banar rasa bamadu karna masak dipuhunnya,” ujar nang bini kukuriak manunjuk.

Palui pina bingung, mancari, manulih kiri kanan kada malihat jua rambutan nang ditunjuk bininya.

“Aku kacar banar malihat, handak banar rambutan nang mahirang itu,” ujar nang bini sambil manangsa kahandakan. Imbah Palui mulai balurut turun, tapihnya takait dahan lalu taungkap sambil dijapainya…….. astaga aku kada basalawar! Uiiii umanya, uuuiii umanya….. ini ada nah sarundutan rambutan hirang, panjang ikal rambutnya,” ujar Palui manyuruh nang bini cangang ka atas.

“Kabul hajadku, kabul kahandak anak di parut, rupanya liur mangidam ini bamacam-macam kahandaknya,” ujar nang bini Palui batandik bahimat.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>