Kisah Mancucuk Saban Hari

sipalui-34Wayah ini di kampung Palui handak maadaakan pamilihan umum. Tapi pamilunya itu sagin mamilih katua RT nang hanyar. Sualnya, bulan ini, masa jabatan Palui sudah habis.

Tiga ikung calun nang dicagarakan jadi katua RT mangganti Palui. Padahal, Palui masih handak haja manjabat pulang, tapi karna inya sudah dua kali tapilih, maka kada bulih umpat lagi.

Tapi Palui kada kahabisan akal. Bininya, si Zaleha dicalunakannya jadi katua RT. Padahal, si Zaleha kada bisa apa-apa, mambaca gin bajuju.

Nang ngarannya Palui, tatap ai dikarasinya. Padahal, Inya pacang basaing lawan Ibus wan Arul, calun katua RT nang lumayan kuat. Apalagi, bini Palui kada tapi mangaluar pada rumah. Tapaksa ai inya giat banar manganalakan bininya ka urang kampung di RT-nya itu. Gambar bininya dipasang dimana-mana, mulai puhun, tihang listrik, pagar rumah urang sampai kandang itik. Sampai-sampai, lawang rumah urang gin diandakinya gambar bininya.

Malihat, kalakuan Palui itu, calun lain tapanasi. Ibus, urang nang baduit tapaksa bamudal maulah gambar nang ganal-ganal ditajakinya di pinggir jalan.

“Jangan kada ingat lah mancucuk ulun, pasti ama-nah” jar tulisan di gambar Ibus sama bunyinya wan tulisan nang ada di gambar Bini Palui.

Tapi, Arul kada mau manuruti, inya mamilih cara lain. Saban urang bakampulan didatanginya. Disana inya bapandiran kisah kamajuan kampung.

Singkat kisah, pamilihan katua RT dimulai. Palui urang nang paling yakin bininya cagar tapilih jadi katua RT. “Urang sudah tahuan wan biniku. Gambar biniku sudah kutampaiakan lawan urang kampung, kada mungkin buhannya masih kada pinandu,” ujar Palui.

Tunggal ikungan, urang kampung mancucuki gambar calun katua RT dalam surat suara nang disadiaakan panitia. Tacatat, 79 ikung nang umpat mamilih katua RT.

Pas panghitungan suara, Palui takajut banar. Muhanya nang tadi santai-santai haja baubah pucat. Bininya hanya dapat dua suara. Nang paling banyak dapat suara si Arul, 70 ikung, sisanya sagin Ibus.

“Bah, baarti hanya aku lawan biniku nang mamilih biniku, nang lain mamilih ka lain,” jar Palui kabingungan. “Baarti buhan ikam kada mamilih biniku jua. Maka kita bakawan,” jar Palui manakuni Garbus, Tuhirang, Tulamak wan Tuganal nang tadi pina kada nyaman wan Palui.

“Iih, tapaksaai Lui ai. Kami sudah karancakan mancucuki gambar bini ikam. saban hari, kami mancucuk gambar bini ikam,” jar Garbus.“Karna kamunyakan, karancakan mancucuk gambar bini ikam, kami kada purun wan Arul, tapaksa ai kami mamilihnya. Gambar Ibus gin kami cucuki saban hari,” Tuhirang Manjalasakan.

“Buhan ikam nih dasar kada cerdas. Maksudnya cucuk akan itu, pas hari pancucukan,” jar Palui manyanyarik.” Ihhh, kaya itukah. Tapi sudah kajadian, maaf ai Lui ai. Mun kaya itu, pamilihan lima tahun nang dudi aku pasti mamilihnya,” ujar Tulamak mambujurakan.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>