Kisah Sayang Gaguling

sipalui-36Urang balaki-babini itu kaya apa haja basasayangnya bila sudah bajalan lima anam tahun sampai puluhan tahun musti ada wayah nang rancak bahualan. Ada-ada haja nang dipaulah jadi alasan bahanu hal halus kawa jadi ganal, sual camburu, hiri atawa mandangar panderan urang.

Kaya itu jua bahanu sual kakanakan, handak ini handak itu nang kada takabul lalu basasarik. Lain lagi sual rumah tangga, bahanu sual banyu, sual tahi hayam, sual mintuha, ipar macam-macam ai. pukuknya sual-sual halus haja sampai dua talu hari atawa sampai baminggu-minggu kada bataguran. Sudah jua Palui mangalah wan bini, tapi rupanya bini Palui parasaan banar, sadikit haja tasalah bisa tasinggung.

Sakalinya sahalus-halusnya parasaan bininya rupanya parasaan Palui labih halus lagi. Parnah wayah guring bamamalaman bininya itu hingga baampah ka anu anak, alasannya manyusui anak karna kada kawa dilapas. Tapi imbah dihatiakan Palui tarnyata kada bamamalaman ai anak malugut manyusu.

“Kalu anak bamamalaman balugut manyusu, pabila lagi abahnya dapat giliran,” ujar Palui garunuman dalam hati.

Isuknya palui mambalas guring mambalakangi bininya, samalaman gaguling diragapnya kada saling lapasan.

Rupanya imbah talu malam hanyar bininya marasa bahwa Palui tasinggung karna kada dihatiakan. isuknya anak diguringakannya wan kakanya di kalambu lain. Lalu bininya mulai mambisai supaya guring bahahadapan.

“Uiiiii…abahnya, kakanakan sudah kupindah kada usah lagi baragapan gaguling. Gaguling nang ganal ini diulah apa, ujar bininya.

Palui tatap kada mahirani, maksudnya supaya bininya itu minta maaf.

Eeeee….. sakalinya jangankan minta maaf malah malawan guring mambalakang sama-sama baragapan gaguling.

Ahirnya Palui laki bini batatahanan kada barawaan sampai bamingu-minggu.

“Ayu ragap tarus gaguling itu, aku kada batanggung jawab bila kaina mati pucuk,” ujar bininya kada sabar lagi wan kalakuan lakinya nang maraju.

“Jangan macam-macam umanya ai, kalu mati pucuk kita sayup manyasal sabarataan.

Kanapa maka ikam baucap kaya itu,” ujar Palui.

“Gaguling nang ikam ragap itu didalamnya kubuati saganggam kapur barus supaya ikam lamah kada badaya,” ujar bini Palui.

“Jangan umanya ai, kita badamai haja. Kada mambadai sualnya hanya karna mambalakangi guring lalu cagar layu saumur hidup,” ujar Palui sambil manimbai gugulingnya lalu maragap ka gaguling ganal nang sudah baminggu-minggu kada diragapnya.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>