Kisah Salawar Bahuma

sipalui-41Palui wan kakawalannya nangkaya Garbus, Tulamak wan Tuhirang bajanji handak tulakan ka kuta. Maklum hanyar haja musim katam makanya lagi kancang-kancangnya epok.

Imbah inya sampai di pasar lalu masing-masing baulanja, ada nang manukar timbaku, gula, asam uyah macam-macam ai nang di tukarnya.

“Ikam handak manukar napa Lui?” ujar Tulamak.

“Aku handak mancari baju tapung wan salawar gasan bagawi,” sahut Palui, lalu inya masuk ka tuku nang bajual baju sambil batakun:

“Adalah bajual baju kain tapung?” ujarnya.

“Ada ai, macam-macam ukuran wan haraga,” ujar nang ampun tuku.

“Salawar tanggung pang ada jualah?” ujar Palui.

Ampun tuku bingung karna kada biasa mandangarnya, lalu inya manjawab: “Kalo salawar tanggung kadada tapi kalo salawar panggung gasan bamanda banyak,” ujarnya.

“Lui, ujar Garbus, padagang itu kada paham salawar tanggung cuba sambat salawar satangah tihang,” pasti inya paham.

“Iya bujur maksudku salawar satangah tihang, panjang kada, handap kada,” ujar Palui manahapi.

“Ooooo…… kalu salawar tiga parapat nang gasan fitnes atawa gasan baulahraga itu banyak cil ai,” ujar urang ampun tuku.

“Ya bujur, salawar tiga parampat gasan fitnes mancangkul, manajak wan mangatam di pahumaan,” ujar Palui manyalajurakan pander karna inya sudah malihat bahwa salawar fitnes itu adalah salawar tanggung bahan tapung nang handak ditukarnya.

“Ikam talalu-lalu bapadah handak fitnes SKJ,” ujar Garbus.

“Aku supan bapadah gawian bahuma,” sahut Palui babisik.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>