Kisah Ganal Bungkusnya

sipalui-81Bulan puasa sudah parak habis, jadi cagar satahun pulang hanyar kawa manamuninya. Nangkaya itu jua pasar wadai nang ada cuma satahun sakali wayah bulan puasa haja. Ulih karnanya, hari itu bubuhan Garbus wan Tulamak bajanji manyampatakan ka pasar wadai.

“Iwak napa nang handak ikam tukar Mak?” ujar Garbus.

“Biniku minta tukarakan iwak hidup,” ujar Tulamak.

“Kalu ikam handak iwak hidup jangan manukar di sini Mak ai tapi di pasar lima atawa di pasar lama,” sahut Garbus.

“Maksudku iwak masak jua tapi iwak banua atawa iwak sungai nang hanyar dimasaki, jadi kada hayam atawa itik,” ujar Tulamak.

“Iwak masak di pasar wadai ini haraganya larang-larang, parak dua kali lipat,” ujar Garbus.

“Kukira wajar haja larang karna padagang harus manabusi wadah bajualan, lalu ungkus gasan baangkut barang,” ujar Tulamak.

“Kalu ikam handak manukar paisan iwak patin, datangi haja kiusnya Palui nang di hujung jalan itu,” ujar Garbus manunjuk. Tulamak lalu mandatangi kius Palui. Sambil manjapai-japai paisan itu, inya langsung manawar haraganya.

“Barapa sa-paisan Lui?” ujar Tulamak.

“Haraganya kaya aku bajual wan urang jua, sa-paisannya Rp4.000. Kalu wan ikam kujuali Rp2.500. Di pasar ini iwak paisanku nang paling murah, rasanya nyaman dan samunyaan iwak hanyar tangkapan jadi rasanya manis. Makanya paisanku ini payu banar, murah, nyaman dan bungkusannya ganal,” ujar Palui.

“Hi-ih, tadi aku manawar di kius sana haraganya paling murah Rp5.000 sa-paisannya. Kalu kaya itu bungkusakan talu paisan, cukup gasan buka puasa dan makan sahur,” ujar Tulamak.

Wayah sampai di rumah, babuka puasa, Tulamak handak marasani dan bahimat makan iwak paisan patin ulahan bini Palui. Imbah manguyak paisannya, bini Tulamak gagarunum sambil manyumpah-nyumpah kasasarikan wan Palui.

“Napa maka pina gagarunum?” ujar Tulamak managur bininya.

“Ikam dibunguli Palui. Bujur haja haraga paisan ini murah banar Rp2.500 sabungkusnya tapi hirisannya halus banar kaya ibu jari batis,” ujar bini Tulamak.

“Maka tadi bungkusannya ganal banar. Kalu bungkusannya ganal pasti hirisan iwak patinnya ganal jua,” ujar Tulamak.

“Ini nah abahnya, saksiakan bungkusannnya ganal banar tapi imbah dikuyak maka iwaknya sacuil, halus banar. Nang ganal itu adalah bungkusannya. Daun pisang pambungkusnya sampai lima lapis, barangkap-rangkap,” ujar bini Tulamak masih haja gagarunum sambil malihatakan tuyukan daunnya.

“Palui, Paluiii… ikam dasar utak barangkap Lui ai. Ikam pangaramput. Ikam itu Lui bajual iwak paisankah atawa bajual daun pisang?” ujar Tulamak sarik mahampasakan kakaciwaannya wayah malamnya batamuan Palui di masigit.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>