Kisah Jalan di Tempat

sipalui-85Wayah ada kariditan matan kuperasi gasan bausaha, Tulamak umpat jua mandaptar. Tapi rupanya wayah inya dapat pinjamannya hasilnya kada sasuai wan nang diharapakan alias kada bahasil.

“Kada bahasil karna patunjuknya kada langkap,” sahut Tulamak.

“Kukira kada karna patunjuknya nang kada langkap tapi karna nang manarima patunjuk itu kada paham,” ujar Garbus.

“Cuba ikam pikir Bus, dipadahakan bausahalah supaya bulik mudal, makanya imbah cukup mudalnya lalu langsung kubulikakan ka kuperasi,” ujar Tulamak kada hakun disalahakan.

“Patunjuknya bujur haja Mak ai, bausahalah mambulikakan mudal injaman itu, tapi harus dihitung huhujungannya supaya kawa pulang diputar gasan dijadiakan mudalnya,” ujar Garbus.

“Sabujurnya aku kada salah jua Bus ai karna nang kujual adalah nasi. Makanya bila kada habis dijual nasinya bisa basi. Dari pada basi dan mubazir maka nasi itu saban hari kami makan sakaluargaan,” ujar Tulamak.

“Alasan Tulamak itu bujur haja Bus ai, daripada nasi nang kada payu itu basi maka labih baik dimakan. Jadi nang dimakan itulah huhujungannya. Karna saban hari kada habis dijual dan saban hari jua dimakani maka itulah huhujungannya,” ujar Palui.

“Kalu kaya itu ikam Mak ai kada cucuk bajualan nasi,” ujar Garbus lihum karna malihat salawas bawarung nasi tadi awak Tulamak makin babulat.

“Kukira Tulamak kada bisa bausaha lain karna nang paling cucuk adalah bajualan makanan tadi itulah. Hanya inya parlu parhitungan, supaya bisa-bisa ma-atur. Nasi wan iwak nang dijual harus nyaman, piring cangkir senduk garpu harus barasih, layanan harus baik, ramah tamah dan hakun haja kurang labih,” ujar Palui manasihati.

“Nang panting bausaha dan badagang itu ‘jangan jalan di tempat’,” ujar Palui manambahi.

“Sudah mulai dahulu sampai wayah ini satiap bajualan atawa bagawian aku kada biasa jalan di tempat Lui ai. Ikam saksiakan saurang Lui ai biarpun awakku lamak, bulat dan barat tapi aku kada biasa tatap jalan di tempat. Aku pasti balinjang ka hulu ka hilir,” ujar Tulamak kada hakun dipadahakan jalan di tempat.

“Wah, wah, ikam ini dasar pambabal Mak ai kada paham nang dimaksud Palui. Jalan di tempat itu artinya kada maju-majunya alias tamandak karna pikirannya buntu,” ujar Garbus lihum.

“Harap dimaklumi Bus ai, Tulamak bukannya kada paham tapi balum paham,” ujar Palui malamahi.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>