Kisah Takutan Bebayar

sipalui-87Palui tulak ka Jawa maumpati rumbungan pambakal mahadiri partamuan partanian di Malang. Rumbungan Palui tulakan bakapal banyu. Ngarannya bakapal banyu tapaksa inya basangu makanan. Sakalinya baluman sawat sampai ka palabuhan Perak, hanyar satangah parjalanan, inya sudah kahabisan sangu.

Tapaksa inya manukar makan di kapal, sakalinya rasa karampukan banar inya. Sakali makan haja bisa habis Rp 50.000 s ampai Rp 100.000. Handak minta bayari wan pabakal, supan jua inya tapaksa amun kawa diharitnya.

“Umpat batakunlah Lui, bujurlah wayah bulikan tadi ikam naik pasawat tarbang dan kalaparan? Lalu wayah turun di bandara pina junjang bajalan. Napa sababnya, padahal naik kapal tarbang itu nyaman pada bakapal banyu,” ujar Tulamak.

“Nyaman dasar nyaman karna lakas sampai, tapi kita harus banyak basangu duit,” ujar Palui.

“Jadi kan apa maka sampai kalaparan?” ujar Garbus umpat batakun.

“Naik kapal udara, naik kapal banyu atawa bakarita api, aku jara-jara sudah Mak ai,” sahut Palui.

“Kanapa maka jara-jara sudah Lui, padahal makan nginumnya sudah tasadia?” ujar Tulamak.

“Wayah bakarita api matan Bandung ka Surabaya, kami ditawari macam-macam makanan.

Makanya aku pasan nasi gureng wan teh es ditambah pulang wadainya ruti kiju. Kami dilayani ramah banar, lalu makanan wan nginuman itu diantar ka wadah kadudu kan kami dan dibari sarbit gasan lap muha. Lalu imbah tuntung, piring wan cangkir diputikinya dan sakaligus manjulung bon tagihannya. Eee … sakalinya haraganya larang banar, pas-pasan duit di kantung,” ujar Palui pina manyasal.

“Jadi itulah nang ikam padahakan bahwa ikam jara-jara sudah itu Lui?” ujar Garbus.

“Hiih, makanya wayah dic kapal tarbang aku bapikir banar dan ahirnya kuputusakan bahwa aku wani balapar haja. Mulai duduk di kapal tarbang itu ditawari gula batu, tapi aku kada hakun karna aku ada mambawa gula batu saurang. Lalu kada lawas tarbang mulai ditakuni apakah handak kupi atawa teh, tapi kujawab aku ada mambawa banyu butul. Kaya itu jua wayah dalam parjalanan di atas, bubuhan pramugari mulai basusurung makanan nasi. Tapi aku tatap kada hakun, aku bapadah masih kanyang dan kada wani makan di pasawat kalu kaina handak bahira. Sedangkan kakawalanku dihiga bahimat makan nginum, ada nasi, iwak hayam, apel, pisang, kupi. Dalam hatiku bapikir, rasain lu, cagar ditagih ratusan ribu kaya di karita api,” ujar Palui bahimat bakisah.

“Ooo … jadi karna takutan babayar itulah maka hakun balapar di pasawat tarbang?” ujar Tulamak.

“Dasar bungul ikam Lui ai, dasar urang gunung, padahal makan nginum di pasawat tarbang itu parai sudah dijamin, bahkan piring cangkir wan mangkuknya kawa diminta gasan dibawa bulik,” ujar Garbus.

“Hiih, aku d asar bungul,” ujar Palui pina manyasal mangakui kabubungulannya.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>