Kisah Kulihan Maunjun

sipalui-94Bubuhannya bila hari parai tulakan maunjun. Bila wayah musim hujan bubuhannya tulak baisukan, kamariannya sudah bulikan. Tapi wayah musim kemarau maka tapaksa makin jauh mancari tambak nang babanyu, makanya tulak baisukan bisa imbah isya hanyar datangan. Bahkan kada jarang parak tangah malam hanyar sampai ka rumah.

“Gawian maunjun ini bujur-bujur hiburan,” ujar Tulamak.

“Biarpun hiburan harus ada hasilnya Mak ai,” ujar Garbus.

“Hasil nang nyata, awak tatap sihat karna basapida jauh tulak ka pamuhaan itu tamasuk ulahraga,” ujar Tulamak.

“Maksudku Mak ai sambil baulahraga buliknya mambawa iwak hasil unjunan,” ujar Garbus.

“Kawa haja diakali. Bila kada pakulihan, kawa haja diganti wan iwak di pasar supaya bini kada sarik,” ujar Tulamak.

“Ooo… kalu kaya itu akal ikam sama wan akal Palui,” ujar Garbus.

“Kaya apa akal Palui itu Bus?” ujar Tulamak handak tahu.

“Aku paham haja disindir Bus ai, tapi biarpun disindir aku kada sarik malah sanang hati. Tapi kita bajanji harus saling marahasiakan,” ujar Palui.

“Marahasiakan napa Lui?” ujar Garbus.

“Kita rancak kalu kada pakulihan, makanya aku manukar di pasar gasan mambawa bulik,” ujar Palui.

“Hi’ih biasa kulihat bila kada pakulihan iwak itu Palui musti manukar di pasar wan tiap manukar pasti dua ikung atawa dua bungkusan. Pukuknya manukar napa haja pasti saraba dua… dua,” ujar Tulamak mambujurkan panderan Garbus.

“Nah, disitulah andak rahasianya,” ujar Palui.

“Rahasia napa Lui?” ujar Garbus karna balum paham.

“Dahulu wayah kita maunjunnya parak maka langsung kawa bulik istirahat di rumah. Tapi wayah maunjunnya jauh maka tapaksa baistirahat di rumah kasinggahan. Karna karancakan singgah maka tapaksa batanggung jawab karna anak nang ampun rumah minta dikawini akibat tahilap-hilap,” ujar Palui pina supan.

“Ooo… jadi karna ikam talanjur barumah duakah maka bila manukar iwak atawa barang harus dua-dua jua?” ujar Tulamak hanyar paham nang dimaksud bajanji rahasia ulih Palui itu.

“Rahasialah, jangan dipanderakan ka mana-mana,” ujar Palui mambari isyarat wan kakawanannya.

“Asal cucuk hitungannya,” sahut Tulamak tatawa.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>