Kisah Babatis Ampat

Palui-01Tabalujur malam Jumahat, pukul sambilan hujan garimis, awak dingin-dingin. Si Palui wan bininya sudah basiap-siap handak guringan. Anaknya nang bungsu, si Aluh Kacil guring sakalambu wan kakanya di ruang subalah.

“Byaaar….pet!!” bakajutan lampu pajah, lalu kadap sarumahan. Palui wan bininya kulir bangun manyalakan lampu templuk.

“Bah….ini maka-am, ngalih banar!” ujar Palui gagarunum mambisiki nang bini.

“Napa ngalihnya?” sahut nang bini bagamat.

“Mun bakadap ngini, kada sip ading ai. Aku kada kawa malihat apa-apa lagi, kadap nah,” ujar Palui, sambil manggagap mahahar ka atas ka bawah.

“Kada ngalih abahnya-ai. Ibaratnya, kalu kita handak manyuap. Biar bakadap, kada cagar ta ka mata,” ujar nang bini manggurui.

“Nah, ia kalo!” ujar nang bini babisik. Kaduanya takurihing, walau pun kaduannya kada malihat lihum bakadap itu, tapi cukup dirasa romantis.

Lagi asyik-asyiknya bakadap itu, tiba-tiba si Aluh Kacil manangis di kamar subalah mancari abah wan umanya.

“Baaaah….u bah, pian di mana, bah? Mama di mana bah?” Si Aluh Kacil batakun sambil manangis.

“Kami di sini, nak ai!” sahut bini Palui garigitan. Palui damintu jua, gagarunum kaciwa karena pesawatnya hanyar tek-ap, tapaksa akan mandarat kambali.

“Ulun kada wani bahai, Ulun umpat pian haja” ujar Aluh Kacil nang sudah ada di muka ranjang Palui. Biar bahahar bakadap anak itu kawa haja manyalusuri kaguringan abah umanya. Kalambu disingkapnya dan si Aluh Kacil tajapai batis.

“Ini batis siapa, bah?”

“Ini batisku, nak ai” jawab Palui galianan dijapai Aluh Kacil.

“Ini pang batis siapa, bah?”

“Batisku jua, nak ai”

“Nang ini pang, dua batis lagi, siapa ampunnya?” Lantaran rasa digaritiki, Palui tasalah jawab “Ya, batis abah jua, nakkai!”

“Umayaaah ……ee…..ee…. abahku babatis ampat….kaya sapi….ee…..si Aluh manangis pulang.

Bini Palui kabingungan, sambil bakadap basasimpun tapih manapih, umpat basuara, mahibur anaknya.

“Anakku sayang! Abah ikam tasalah sambat. Nang dua tadi adalah batis mama, cuma andaknya batatai batis abah ikam. Abah ikam tatap babatis dua.” Lantaran tangis si Aluh nyaring wan kuciaknya, maka tabangun kakanya, takajut wan tumbur sarumahan.

Tabalujur …..byaaar …lampu listrik menyala dan saisi rumah itu tarang bandarang. Suasana tanang kambali, jam manunjukkan pukul sapuluh liwat.

“Ayo…..siapa handak guring-guring, atawa handak manonton tipi. Aku handak bakamih!” ujar Palui nang diiringi bininya ka dapur.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>