Kisah Bagalar Sarjana

sipalui-97Bini Palui bulik dari pasar, takajut malihat undangan di palatar rumah ba andakan. Undangan pangantinan minggu kaina di Banjar. Nang ma undang Julak Sapran, urang kampung sini jua lawas puluhan tahun bagana di Banjar,mangawinakan cucu kasayangan.

Dalam undangan tertera nama Palui SH, wan bini, nang sabuting Tulamak BSc, sabutingnya lagi Garbus BA wan bini.

“Bingung ulun abahnya ai, napa pian sapakawanan maka bagalar sarjana? Pabila kuliah bahari di Banjarkah…,” jar nang bini ka anu Palui.

“Iya am aku pun bingung jua nah, padahal dahulu aku jadi pa ujekan haja, kada kawa kuliah, duitnya kada baisian jua. Nang panting kita takunakan langsung wan Julak Sapran pas arian saruan kaina,” jar Palui.

Pas hari Ahad baisukan, pina rami di mutur Avanza, Palui marintal mutur gasan saruan ka Banjar. Rami buhannya ba ampat sapamandiran, kahulu-kahilir, kadarat-kalaut, banyak bapandir haja di mutur.

“Kita ini kaya handak mahadiri wisuda haja? Sapakawanan Abahnya ai dapat galar,” jar bini Palui lantih.

“Iya am umanya Amat ai, kaya apakah panilaiannya…,” jawab Garbus.

Takumpulan di pangantinan, himung Julak Sapran didatangi Palui sapakawanan.

“Napa julak ulun ini digalari Palui SH, maka ulun tamat SMA haja, pian tahu saurang, gawian ma ujek tumat bahari,” takun Palui.

“Ulun pang napa bagalar BSc,” sahut Tulamak jua.

“Ulun bagalar BA, inya napa julak,” jar Garbus pina himung.

“Cuba dangarakan buhannyalah, Palu ,SH itu artinya Palui ini suka basilawar handap, iya kalu? Sampai saruan ini gin ikam basilawar handap haja, basilawar kada sampai ka buku lali, sampai bawah lutut haja. Makanya kusambat Palui salawar handap, disingkat SH,” jar Julak.

‘Ai julak nih ada-ada haja,Tulamak pang napa BSc,” jar Palui.

‘Tulamak BSc itu, artinya bakas supir camat aruah Zain, bahari sidin jadi camat di Sungai Raya, iya kalu, Mak?

“iya banar Julak ai, lagi bahari sampat jadi supir camat,” jawab Tulamak.

‘Saikung lagi Garbus napa jadi BA.”

“Garbus BA itu artinya banyak anak, ikam bus baisi anak lima ikung, napa kadada nang dibawa saruannya ka sini, iya kalu buhannya? “ ujar Julak Sapran sambil tatawa.

‘Bujur banar barataan jar pian Julak ai, tajawab sudah arti galar kami,” jar Palui disambut tatawa barataan jua.

“Jadi galar iincaan haja,julaklah…,” sahut bini Palui.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>