Kisah Bakupiah Putih

sipalui-109Takumpulan di masjid salat sunat hari Arba Mustamir. Tujuannya tulak bala supaya dalam satahunan dihadap ini kadada musibah nang manghinggapi warga masyarakat di daerah Palui. Jadi samuaan warga jiran di kampung disuruh ulih tetuha kampung supaya umpat maramiakan jamaah baibadah di hari Arba Mustamir.

Jamaah Arba Mustamir dipimpin ulih Guru H Ahmad Durauf nang terkenal di daerah Palui saurang.

”Mudahan kita dengan melaksanakan ibadah salat sunat tulak bala, mambaca yasin, istigfar dan lainnya cagar terhindar dari segala macam mara bahaya wan musibah, salama satahunan nang cagar kita jalani,” ucap guru di hadapan jamaah masjid.

“Alhamdulillah banyak banar jamaahnya. Kawa buhan pian meluangkan waktu gasan baibadat. Ini ibadat satahun sakali kita laksanakan, mudahan kita panjang umur, kawa pula melaksanakan ibadat pada hari Arba Mustamir tahun nang akan datang,” ucap guru penuh semangat.

Palui, Garbus, Tulamak, sapakawanan hadir di shaf pamulaan satangah jam badahulu sudah hadir.”Aku rasa himung Bus ai, Mak ai malihat buhan ikam, kawa manyampatakan waktu gasan baibadat, padahal gawian rahatan rami, nang kaya maujek wan manjaga parkir, pada jam 3-an ini?” ujar Palui.

“Aku sadar sudah tuha Lui ai. Baik umpat kaya urang jua, ka masjid,” sahut Garbus.

“Iya am Lui ai? Kada mau habisnya, bila mahadapi gawian haja,” jawab Tulamak sambil lihum.

Limbah tuntungan acara baibadah di masjid, rami basalaman guru beserta jamaah lainnya. ”Umai Lui, himung banar aku, ikam hakun umpat ka masjid jua,” ucap guru H Ahmad Durauf sambil basalaman ka Palui.

Pas basalaman ka Garbus wan Tulamak lalu guru baucap, ”Kada ngalih lagi Garbus wan Tulamak, buhan ikam ini badua, sebab putih-putih rambut kaduanya ya, kada ngalih lagi bakupiah haji.”

“Iya pas guru ai. Umur 40-an sudah jadi hibak huban di kapala,” sahut Garbus pina kada asaan.

“Kada ngalih lagi guru lah, bakupiah putih, sudah sabukuan kapala bahuban,” sahut Tulamak marasa banar inya bahuban.

“Nah, sampai sudah masanya buhan ikam badua ini, rambut bahuban, kaya urang bakupiah putih haja lagi,” ucap guru lihum, ambil baucap pula sidin; “Palui masih hirang banar rambutnya, alias awet muda.”

“Ulun ini guru lah, rajin mandi basah, jadi kapala dingin tarus, kada panas. Jadi rambut rancak basah tarus, dalam hati urang kada mau pisah wan bini, ” Palui asa himung, lihum guru. Lakas Tulamak wan Garbus parmisi bulik.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>