Kisah Gulungan Tinggi

sipalui-106Rami di sakulahan bila Palui turun, tapi sebaliknya bila Palui kada turun rasa sunyi buhan guru wan murid. Biar hanyar dua tahun jadi guru honor, kalakuan Palui cukup mewarnai suasana di sakulahan.

”Ikam ini Lui ai bujur guru honor tapi gulungan tinggi,” ujar kapala sakulah marawa Palui.

“Kada jua ah, Pak ai? Ulun hanya sekadar guru honor, kadada apa-apanya, Pak ai, jika dibanding guru negeri…,” sahut Palui pina marista.

“Bapak kapala ini bisa menyukai Palui,” sahut Garbus.

“Kaya itu jua pang Bus ai, kalu jadi guru kapala itu, harus bisa manyayangi anak buah,” ucap ibu Eri Qadariah guru IPS.

“Aku ini buhannyalah kada kawa mambari duit, manyanangi pander barang ka anak buah,” ujar sidin pulang.

“Gulungan tinggi jar pian, apa maksudnya, pak?” takun Palui manggamati.

“Takuni ibu Eri nih, apa maksudnya gulungan tinggi, tapi masih mahonor,” jar kapala manyuruh ibu Eri.

“Nah ulun kada tahu jua, Pak ai. Biasa te, buhan guru negeri haja pang, bila tiga tahun naik pangkat, sampai dua belas tahun, kawa pangkat jenderal…,” jawab ibu Eri lancar.

Tuntung bapanderan,lonceng babunyi masukan pelajaran jam kaampat. Taputung kesah Palui gulungan tinggi. Pas jam tangah hari, sampai waktu Salat Zuhur, guru-guru bauduwan di kulam musala sakulahan.

”Oi…Lui , ikam ini gulungan tinggi,” rawa pulang kapala sakulah, malihat Palui handak masuk ka kelas.

“Omai, Pak? Ulun guru honor haja, kada bagulungan lagi,” jawab Palui pina kasipuan.

“Ayu ja Lui ai, aku pacahakan nah,” jawab kapala sambil lihum.

“Kami handak tahu,Pak ai,” ucap Garbus lakas.

“Ikam itu tiap baisukan Lui ai, bila habis baudu gulungan salawar tinggi, kaya itu jua bila tangah hari habis baudu handak Salat zuhur, gulungan salawar tinggi pulang, maka ikam mangalunyur masuk ka kelas, lihum buhan murid,” jar sidin jua umpat lihum.

“Bah iya pang. Ulun bahanu mangalunyur haja limbah baudu, kada ingat lagi maulur kasalawar, makanya pian sambat gulungan tinggi. Iya kalu,Pak…,” sahut Palui mamicik ka kapala, tatawa kapala sakulah. Naik gulungan lakas banar Lui ai. Tapi naik pangkat ngalih banar, kaya aku nah, pangkat IV a haja, sudah sapuluh tahun, sidin marista sakalinya.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>