Kisah Turun Naik

palui-07Zaman wayah ini binian kada hakun lagi bagana di rumah, apalagi ada kabisaan manyanyi atau nang lainnya. Kaya itu jua bini Palui ada baisian bakat manyanyi. Umpat kalompok pa urkesan. Jadi bila ada nang maundang urang bakarasmin umpat bini Palui sebagai biduanitanya atau istilah keren saat ini jadi artisnya.

”Taungut Lui lah ikam ini rancak, napa bini jarang di rumah, iya kalu Lui?” rawa Garbus ka Palui.

“Sadang sudah Lui ai, bini haur bausaha tarus, ikam makalahan am, maragap guguling haja di kalambu,” sahut Tulamak.

“Ayuha biniku bulik haja ka rumah, wan kami saling percaya satu sama lain,” Palui baucap mahibur diri.

Dalam rangka memeriahkan hari jadi di daerah Palui, maka rancak nang bini ka luar malam mahibur masyarakat lewat kelompok urkes dangdutnya, di arena pameran atau istilah saat ini Expo Pembangunan 2016.

”Mabok lagi ah, mabok lagi? Pulang larut malam, badan sempoyongan, mabok lagi ah?” suara bini Palui mandayu-dayu bikin penonton asyik.

“Asyik bini Palui? Ayak bini Palu ai,” ujar penonton keasyikan.

Jam 12 malam bahkan jam 1 dinihari, bini Palui hanyar datang ka rumah, diantar urang bamutur bulik ulih bos pa urkesannya.

”Assalamualaikum?” ketuk bini Palui.

“Waalaikum salam,” sahut Palui kujup-kujup mata mambukai lawang.

“Maaf abahnyalah, ulun hanyar datang, rami banar malam penutupan pameran, jadi hanyar ampihan,” ujar nang bini.

“Aku ini umanya ai, bahanu turun tensi darahku, bahanu naik. Bila ikam kadada di rumah, apalagi sampai jam 12 malam kada bulik, tensi darahku naik banar, mun rasa purun ka laki, tiap malamkah ikam umpati baurkesan atau bakaraokean, ” ujar Palui marista banar.

“Kada kawa pang ulun handak bulik badahulu, rasa ngalih wan bos karaokenya. Apalagi bahanu dapat saweran saratus atau dua ratu ribu, kada nyaman ditulak, itu pang ramenya jadi artis…,” sahut nang bini lantih.

“Ampih haja umanyalah, jadi biduanita itu,” sahut Palui kada disangka baucap seperti itu.

“Nah, pian jangan repot-repot mamikirakan ulun, kada betaha basalingkuh pang ulun ne. Laki ulun hanya pian saikung haja,” ucap nang bini kada mau kalah.

“Kaya ini haja umanya ai, aku ka mana ikam diundang bakaraokean aku umpati. Daripada tensi darahku naik tarus, bahanu jam 12 malam hanyar datang, aku kada nyaman, apalagi satiap kali manyanyi ikam mangacak ampun lakian pisit banar? Hatiku manangis nah…,” Palui manyahuti sambil manciling.

“Tasalah paham pian abahnya ai wan habar itu. Ulun mangacak mikrupun tiap kali banyanyi, itu pang nang bujurnya,” sahut nang bini mambujurkan nang digawinya.

“Oh, damintukah nang bujurnya? Makanya am habar macam-macam, bila bini jarang di rumah,” Palui mangarti ampih sarik.

“Ayuha mulai malam isuk abahnya ai, bila ulun ada undangan bakaraokean, umpati ulun mambuntil, kasayangan te ka bini…,” tatawa bini Palui,lakas Palui minum jamu ha..haa.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>