Kisah Ampih Bahapi

palui-12Salawas rajin duduk di warung Mama Riska nang janda satu anak, Palui dua laki bini kada barawaan di rumah.

”Mana mama Amat hapiku, ikam sita barapa hari ini, sulit banar aku bakomunikasi wan kakawanan?” ujar Palui baisukan jam tujuh manakuni bininya pina sarik.

“Sual hapi itu urusan ulun, kada urusan pian, abahnya ai? Nang manukarakan hapi ulun kalu?” jawab bini Palui lantih.

“Kaya ini haja umanya ai, kita bahurup, aku di rumah batatapas, mahuan anak wan gawian rumah tangga lainnya. Ikam nang turun maujek setiap hari, hakunlah?” sahut Palui mambari alternatif.

“Kada kaya itu abahnya ai. Kada pas lagi binian jadi paujekan. Di Banjar, di hulu sungai kadada binian jadi paujekan?” sahut nang bini sarik jua.

“Oh, iyakah?’ Palui maiyakan ucapan bini.Datang ka pangkalan ujek si Palui, landung pada buhannya nang lain.

”Napa Lui rancak datang landung ka pangkalan, jadi kana giliran maantar penumpang tadudi jua?’ rawa Garbus.

“Ya macam-macamlah Bus ai, ngaran hidup bakaluarga ini,” sahut Palui.

“Ada apa Lui, sambat haja bila ada masalah, nyaman kami mancariakan jalan kaluarnya,” sahut Tulamak bijaksana.

“Aku ini babarapa hari sudah, bahual wan bini. Karana hapiku disita umanya Amat, jadi kada bahapi lagi ka mana-mana…,” ucap Palui sadih.

“Inya napa Lui?” takun Garbus.

“Maklumlah, aku rancak di SMS binian penuh rayuan. Ini pang pangkal masalahnya,’ Palui mulai bakesah.

“Ikamkah dikahandaki binian Lui? Janda atau gadis…?” takun jua Tulamak.

‘Aku babarapa hari lalu duduk tiap habis salat subuh di warung janda bungas anak saikung Mama Riska, minum teh panas, makan wadai, makan nasi kabuli, sudah itu bulik maambili bini di muka masjid, dipadahakan biniku bagandakan…,” Palui manyambung kesah.

“Kenapa bini ikam jadi cemburu banar Lui?’ takun Garbus.

“Mama Riska rancak ma SMS, dibaca ulih biniku, maka penuh kata rayuan, itu pang nang menyebabkan biniku sarik banar ka aku ini. Makanya hapiku disitanya…,” ujar Palui maungkai masalahnya.

“Kita datangi Mama Riskanya ya? Supaya jangan lagi ma SMS Palui penuh rayuan kata-kata mesra, sehingga urang dua laki bini bahualan di rumah tangga…,” ajak Tulamak mambawai Palui ka Mama Riska.

Datang Palui wan Tulamak ka warung Mama Riska.

”Oi kakak Paluikah, lama tak jumpa, kak Palui makin bungas aja deh?” rayu Mama Riska.

Palui lihum tapi hati asa kada nyaman.”Mama Riska, aku minta maaf, ikam jangan ma SMS aku lagi, nah gara-gara ikam rancak ma SMS penuh kata rayuan, aku bahual dua laki bini?” ujar Palui bagamat ka Mama Riska.

“Kasihan Palui Mama Riska ai? Hapi disita bininya, jadi sulit banar urang handak mahubungi minta antar baujek, banyak kahilangan penumpang nang sudah jadi langganannya, Palui kada kawa manjawab dihubungi, hapi disita bininya,” ujar Tulamak mambela Palui.

“Oh, iyakah ulun minta maaf nah kalu kaya itu akhirnya,” ujar Mama Riska sambil manyalami ka tangan Palui wan Tulamak.

“Ayuha cukup sampai di sini haja masalahnya. Kita tetap haja bersahabat, tapi jangan ba SMS-an nang penuh kata rayuan?” jawab Palui lakas bulikan wan Tulamak.

“Oke kakak Palui,” ujar Mama Riska nang katuju ma SMS Palui.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>