Kisah Kada Tahan Maarit

palui-11Rancak curhat pambakal ka Palui. Salawas wayah ini, banyak remaja putra maupun putri di kampungnya nang kawin muda atau nikah usia dini, sehingga menjadi keprihatinan semua pihak termasuk abah pimpinan daerah.

“Ikam Lui lah, karana sebagai kapala urusan pambangunan, kutugasakan mambari panyuluhan ka masyarakat khususnya terutama remaja putra-putri di kampung kita ini jua,” ujar pambakal ka Palui.

“Ulun akur tarus pambakal ai, tapi harus ada pang nara sumbernya nang ahlinya mandampingi,” sahut Palui besemangat.

“Tenang haja Lui ai, sudah ada jadwalnya kuulahakan. Isuk baisukan di aula SMA , kita kumpulakan remaja putra-putri sakampungan,” sambat pambakal.

Baisukan , sekitar jam 07.30 Palui sudah mahadang di kantur pambakal handak tulakan panyuluhan tentang bahaya nikah usia dini.

”Kitakah Lui, tulakan ka aula SMA?” ujar narasumber dari kantur KB daerah setempat nang bungas bangaran Hj Ida Fitri, bini seorang camat di daerah Palui jua.

“Para remaja sekalian, wayah ini sangat memprihatinkan, banyak remaja kita, baik putra maupun putri nikah pada usia dini. Bahkan, balum tamat SMA sudah manikah atau kawin. Punya anak saikung, dua ikung sarak, cerai, karana kada siap lagi mambina bahtera rumah tangga…,” ujar Hj.Ida Fitri nang akrab disapa Hj Ida.

Umur nang ideal itu malaksanakan pernikahan bagi binian 19 tahun ke atas, lakiannya 21 tahun ke atas. ”Kalu manurut Nabi, lakian umur 25 tahun, itu matang banar sudah…,” sambung Hj.Ida nang sering mambari panyuluhan wan baceramah agama di masyarakat.

“Bulihlah batakun,Bu?’ salah seorang murid maangkat tangan.

“Bulih banar, jurungakan Lui mikrupunnya supaya jelas inya batakun?” sahut Hj.Ida.

Palui bergegas manjurung mikrupunnya.

”Tarima kasih atas kesempatan nang dibarikan kepada ulun. Terus tarang haja Bu lah, ulun kada tahan lagi maarit, napa daripada bazinah, lebih baik ulun kawin kalu? Kaya apa bagus hajakah, Bu?” ujar murid nang bangaran Laila Hasanah.

“Kaya apa ini Lui manjawabnya, aku kada bisa am?” sahut Hj Ida ka Palui.

“Kaya ini Laila lah. Bbahari itu aruah kayi wan aruah abahku kawin limbah tamat SMP, dahulu balum ada istilah baKB seperti wayah ini. Sesudah ada program KB maka pemerintah manangati remaja-remaja kawin usia dini. Sebab banyak sudah kejadian, sekolah ampih, ekonomi kada siap, umpat wan kuitan lagi, kada mandiri itu pang meskipun sudah kawin, tahu nyaman haja. Sudah ada pina bahual sadikit dua laki bini, balajur basarakan haja langsung, siapa nang batanggungjawab?” ujar Palui umpat prihatin karana banyak perkawinan di usia muda, baceceran anak.

“Ulun kada tahan maarit lagi, Pak Palui ai, kaya apa nah? Guring kada basilawar lagi…,” sambung Laila.

“Kaya apa Bu, solusinya?” takun Palui ka ibu Hj Ida pula.

“Solusinya jangan tapi malihat tv nang tayang untuk urang dewasa, di hapi buhan ikam jangan ada konten video porno, film porna, jangan lagi mambuka internet nang kada mandidik, Laila ai, wan seluruh buhan murid lah? Ampih dahulu ikam bapacaran Laila lah, kena bila tamat SMA hanyar disambung kembali…,” ujar Hj.Ida manasihati.

“Inggih Bu ai? Kena ulun putusi pacar ulun…muyak bapacaran kena mangganggu sakulah haja…,” ujar Laila.

“Terima kasih Laila lah, itu sikap nang kami kahandaki,” sahut Hj Ida sambil lihum.

“Alhamdulillah, ada kulihan hari ini kita mambari panyuluhan…,” sahut Palui asa himung jua.

“Napa Lui, maka lihum tarus ikam?’ rawa Garbus limbah tuntung panyuluhan.

“Ini nah, kami sukses mambari panyuluhan, barakat doa ikam jua Bus ai, umpat mandukung program KB, jangan nikah usia dini,” sahut Palui, umpat jua himung Garbus.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>