Kisah Pamburung

Palui-14Salawas baisi burung ne Palui kada tapi kaluar rumah lagi limbah bulik di sakulahan, bagana di rumah haja. Kada bahurun lagi ka warung Uwa Halidah atau ka kios Wahyu. “Napa Lui kada kaluar lagi kamarian atau malam ?” rawa Garbus.

“Aku ada kasibukan maharagu burung,” sahut Palui.

“Burung apa Lui? Burung dalam silawar saku nih,” sahut Tulamak sambil lihum.

“Aku manukar burung pipit, gelatik, tinjau karang wan sambialau habis jutaan rupiah wan sangkar-sangkarnya, handak baulah hobi hanyar, kalu dapat hoki iya kada,” sahut Palui.

“Maksudnya hoki nitu apa Lui?” takun Garbus.

“Hoki nitu maksudnya untung nang barlipat,” jawab Palui. “Inya ada urang nang manukar burung sambialau dua juta, limbah barapa kali umpat lumba burung bakicau naik pasarannya, jadi 30 juta ditawar pamburungan, nah kada untung ganal lah. Tapi nang ampun burung kada mau manjual masih sayang jarnya. Eh sakalinya isuknya burungnya nitu mati, karana kauyuhan bakas umpat lumba burung bakicau sacara beruntun, han kada manyasal lah kahilangan duit 30 juta,” Palui rami bakesah.

“Jadi ikam handak kaya nitu juakah?” takun Tulamak.

“Bagamatan Mak ai, basasar tunggal dikitan, akhirnya aku dikenal jadi pamburung kenanya iya kalu?” Palui lihum. “Ayuja aku parmisi handak malihati burungku nah?” Palui maninggalakan buhannya.

“Asal burung dalam silawar ikam Lui ai jangan lapas,” sahut Tulamak bagaya.

Sayang banar Palui wan burung-burungnya nitu. Pariksa-mamariksa, maitihi banar kalu ada nang pina lapar lakas diumpaninya, kaya burung sambialau nitu wan jangkrik makanannya, harus minta cariakan anak atau urang lain supaya jangan pagat makanan kasukaannya jangkrik. Kaya burung lain kawa haja manukar umpat di urang bajualan umpan burung nyaman haja nitu umpannya, saikung sambialau haja nang pina tangalih umpannya.

Baisukan Jumahat atau baisukan hari apakah pina dilihatnya burung buringisan dimandii Palui burung-burungnya. Hapi diulahakan aplikasinya supaya babunyi burung jua, jadi kada bahapi lagi wayah ne Palui diandak di parak kurungan burung supaya suara hapinya burung bakicau, jadi burung suka inya.

”Napa abahnya burung tarus dijanaki? Burung pian maka am lintuk tarus?” rawa nang bini takulibi.

“Iya am umanya ai hobi hanyar nih manyita banar ka waktu, bahanu aku talambat ka sakulahan haur maharagu burung tarus…,” sahut Palui.

“Ulun takutan kalu pian taganggu tugas di sakulahan haur maharagu burung haja, kuler turun kena? Ne rancak jam tujuh hanyar turun? Kalau kena diampihi urang jadi guru,” ucap nang bini masih pina sarik.

Tadimapakah Palui handak jadi pamburung sakalinya tunggal ikungan burungnya matian, ujar urang te kana panyakit flu burung.

”Umai nah matian burung lima ikung, haraganya jutaan rupiah? Habis kada jadi pamburung aku, jangan untung malah jadi buntung? Nasib-nasib kada buhan pamburung nang ahlinya pang baingu burung…, iya sudah,” Palui gagarunum.

“Han apa jar ulun, uumpatan haja handak jadi pamburung, akhirnya buntung ya pian ne?” tumpalak nang bini, Palui mandam haja inya.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>