Kisah Titipan Ilahi

Palui-15Buhan guru dituntut jua sakalinya malapurakan harta kakayaan , karana dianggap sabagai aparatur sipil nagara, kada pajabat haja jua matan tahun 2017 ne.

“Nang ngalih nitu nang banyak baisian harta, tapi kaya aku karana kada banyak baisi harta bargarak maupun harta diam, lakas haja tuntung maisinya?” ujar Palui ka guru lainnya di sakulahan.

“Malihat pang Pak Palui harta pian apa haja, nyaman ulun maniru?” takun ibu Indri.

“Nah ikam sual maisi kakayaan ne kada kawa batiruan lain halnya ujian kumpetensi guru kawa am batiruan bila sualnya sama, kalu harta masing-masing kaya Pak Kepsek sidin baisi pabrik banih, kabun sawit, pian adalah baisi kaya itu, kadada kalu?” sahut Palui.

“Inggih Pak Palui ai, saadanya ai ulun lah maisi karana kada banyak jua baisian harta, habis dimakan sabulan jua gajih,” ibu Indri manyahuti.

“Apa nang ada dilapurakan, nang kadada jangan dipadahakan harta saurang, kena ngalih kalu ada pamariksaan, dimana ujar urang kulihan harta itu,” Palui bapapadah.

Ibu guru saikungnya manyambat jua ngalih maisi lapuran harta kakayaan pribadi.

”Hartaku ne titipan Ilahi jadi ngalih dilapurakan,” ujar ibu Laila Safitri, janda nang banyak baisi harta tatap mangaku kada paduitan tarus.

“Itu nah nang kaya mubil xenia wan mubil kijang dimuat jua lapurakan?” sahut Palui.

“Itu Pak Palui ai mubil titipan Ilahi, kada mubil ulun. Jadi apa nang ulun lapurakan?” jawab ibu Laila.

“Ngalih am mun saraba titipan Ilahi kalu barataan kaya pian baparinsip,” ujar Palui lihum.

“Nang ngalihnya kaya mubil itu tadi Pak Palui ai tukaran abah ulun jua ada, kada tukaran ulun saurangan, jaka ulun masih balaki tukaran wan laki jua umpat,” ibu Laila bingung.

“Manurutku mubil pian dua buah, tulis sabuah haja nang asa dianggap duit pian barataan, iya kada?” Palui mancariakan jalan kaluarnya.

Rami buhannya saling maisi masing-masing lapuran harta kakayaan nang cagar dikirim via online. Ada nang baisi harta ratusan juta, baisi pabrik banih, amas, intan , tanah pahumaan, mutur, sapida mutur, pulau nyiur wan sabagainya.

Tapi panyadikitnya harta kakayaan ibu Laila Safitri haja, isiannya banyak kusung.

”Napa banyak kusung ibu Laila?” takun kepsek. Aku lihat ikam ne tamasuk guru UKB, urang kaya baru, tapi lapuran harta kakayaan ikam banyak nihil?

“Itu Pak ai bukan harta ulun sorangan, tapi harta kakayaan titipan Ilahi samuanya, baik mubil, rumah, sapida mutur, amas, tarnak sapi wan itik,wan pahumaan, iya kalu Pak Palui?” ucap ibu Laila Safitri sambil manyirit ka Palui.

“Kaya itu pang Pak Kepsek prinsip ibu Laila,” sambat Palui lakas.

“Bah iya pang kalu kaya itu? Kada kaya aku lah, saikung ayam gin kamusakukakan dalam lapuran harta kakayaan, sahingga aku parak satangah M baisi harta, paling banyak di sakulahan ne,” ujar kepsek tagas. “Baikilah Bu Laila, jadi nyaman kita kirim via online…,” sidin habang muha.

Mandam haja ibu Lailnya nya, Palui lakas bajauh maninggalakan kepsek wan ibu Laila. Takutan jua Palui kalu kana samprot kepsek.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.

You may use these HTML tags and attributes: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>