Kisah Gunting Keliling

palui001Pusing jua Palui kalu sekadar satu usaha haja, kada bakalan bakacukupan, apalagi maujek konvensional mulai ditinggalakan urang wayah ne, ada ujek modern nang taharat, sapida muturnya hanyar, urangnya anum-anum, saurang tuha sudah?.

“Apa dibawa gunting wan caramin Lui, gasan apa?’ rawa Garbus.

‘Ada haja Bus ai, nang ngaran urang handak bausaha tambahan?’ sahut Palui.

“Usaha apa Lui?’ takun Tulamak.

“Saparti ikam lihat Mak lah? Aku handak bausaha jadi tukang gunting keliling dimana kuala manusia bamandak aku dahulu manawarakan jasa bagunting, murah haja sakapala 10 ribu,” ujar Palui manjalasakan.

“Kawalah Lui ikam mambawa alatnya basapida mutur?” takun Garbus.

“Kawa haja Bus ai, kursi plastik , gunting , caramin, larapan janggut, wan lainnya sanggup haja aku,’ ucap Palui asa himung.

“Jam barapa operasionalnya Lui?” takun Tulamak.

“Imbah tuntung maujek sakira jam 11 aku bacacarian lokasi nang rami disinggahi gasan usaha baguntingan,” Palui mancuba peruntungan usaha jadi tukang gunting keliling.

Mulai hari partama Palui manggunting anak Garbus.”Duduk nang manis Utuh Busan lah, nah paman manggunting rambut pian?’ celoteh Palui ka anak Garbus.

“Inggih Paman Palui ai, hati-hati kena tagunting talinga ulun?” sahut Utuh Busan.

“Siip Tuh ai,” Palui kada handak kalah wan Utuh.

Dihari partama nitu, pukuknya kakanakan wan urang tuha rami manyurung kapala, minta guntingakan Palui.

”Dimana ikam baisi kabisaan Lui?” takun Garbus imbah manggunting anaknya.

“Aku bahari balajar di SKB (Sanggar Kegiatan Belajar) hulu sungai dibawai Pak Haji Amberi, jadi pang ada kabisaan jua,” Palui lihum.

Pina lihum haja Palui sapanjang jalan bulik ka rumah, karana hari partama baguntingan rami urang manyurung kapala. Dihitung-hitung duitnya kulihan haja Rp 150 ribu.

Hari kadua sakira jam 11 jua inya turun wan paralatan baguntingan. Tulamak mangiyau ka Palui, handak minta jasa Palui manggunting anaknya nang rambut sudah panjang.

”Tulung Lui ai, anakku Utuh Sarden guntingakan rambutnya,” ujar Tulamak.

“Ayu Tuh Sarden lakasi duduk aku guntingakan,” sahut Palui.

Duduk manis anak Tulamak bagunting naya. Karana banyak bapnder tarus Palui wan Tulamak, akhirnya kurang konsentrasi manggunting Utuh Sarden.

”Akai Paman Palui, ulun sakit talinga paman ai…,” Utuh Sarden bakuciak.

Dilihati Palui sakalinya bedarahan talinganya, pucat Palui.

“Napa Lui anakku, ikam putungkah talinganya!” sarik Tulamak.

“Kada,kada,kada singhaja Mak ai,” Palui masih pucat, anak Tulamak sasain manangis.

“Ya sudah Lui ai, ikam iringi aku ka rumah sakit mambawa anakku, wan ungkusiakan baubatnya,” Tulamak gagarunum.

Han jarku Lui , kada nyaman-nyaman jadi tukang gunting, talinga anak urang kada senghaja duputung wan gunting, asanan manatak rambut haja. Ingat akan Lui ai, nang akan datang, jangan lagi manggunting sambil bapanderan.

Leave a Reply

Your email address will not be published. Required fields are marked *

Time limit is exhausted. Please reload CAPTCHA.