Kisah Haraga Dahulu

palui-33Wayah hari parai tadi Palui wan kakawalannya tulakan ka pasar. Sabujurnya kada handak manukar napa-napa tapi hanya handak bajalanan balilihat haja daripada baungut di rumah. Kalu hari Ahad biasanya bubuhannya maunjun, tapi hari parai ini kabalujuran hari Jumahat jadi tamasuk hari pendek karna harus ka masigit.

“Kada usah banyak mambawa duit Bus ai,” ujar Palui.

“Kadada nang dibawa Lui ai, sahibar gasan cukup makan nginum haja,” ujar Garbus.

“Aku pas takana karing jua Lui ai, makanya saadanya haja,” ujar Tulamak.

“Nah, artinya samunyaan mambawa duit. Supaya kainanya kada baasanan makan nginum, kira-kira barapa duit nang ada di kantung ikam,” ujar Palui batakun.

“Kalu sual barapa jumlahnya, aku supan bapadah Lui ai karna halus banar,” ujar Garbus.

“Kukira baik jua kita bapadah barapa kita masing-masing baisian duit di kantung supaya jangan tahutang. Kalu sampai tahutang basupanan banar. Aku basangu lima ribu,” ujar Tulamak jujur.

“Sama, aku baisian lima ribu jua,” ujar Garbus.

“Nah, kalu kaya itu sama jua wan aku. Makanya bila baulanja jangan labih pada lima ribu,” ujar Palui langsung mambawai kakawalannya baistirahat nginuman imbah batis uyuh kuliling-kuliling pasar.

“Kita singgah di warung nang nyata-nyata ada tatulis haraga makanan wan haraga nginumannya,” ujar Garbus.

“Itu nah, ada warung batenda. Di tendanya tatulis katupat kandangan Rp3.000, nasi rawon Rp2.500, gado-gado wan soto banjar Rp3.000 jua,” ujar Palui manunjuk.

“Supaya adil baiknya kita bayar saurangan-saurangan haja dan pasan makanannya supaya sama,” usul Tulamak.

“Ayu cil, ulahakan soto banjar tiga buah, banyu nginumnya banyu putih haja,” ujar Palui mamasan.

Imbah tuntung makanan, lalu Palui batakun barapa haraganya.

“Hitungakan cil, barapa samunyaan. Soto tiga buah nginumnya banyu dingin,” ujar Palui batakun.

“Samunyaan ikam batiga jumlahnya Rp15.000, nginumnya parai haja,” ujar acil warung manyahut.

“Kanapa larangnya cil? Kada tasalah hitunglah sampiyan cil?” ujar Tulamak.

“Bujuran haraga soto banjar tiga piring Rp15.000 sapiringnya Rp5.000, karna sotonya bahintalu, basu’un, babawang basanga,” ujar acil warung.

“Tapi… tapi di tenda warung sampiyan ini haraga soto banjar tatulis Rp3.000,” ujar Palui manunjuk kain tenda.

“Ooooooo… itukah? Tulisan itu balum taganti, itu haraga tadahulu sabalum haraga minyak naik,” ujar acil warung

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.