Kisah Tukang Katik

palui-2Meski hidup di kampung, Palui wan kakawalannya handak jua tahu parkembangan kuta. Makanya tiap pagi, mun kadada gawian, bubuhannya tulakan ka kantur kapala desa umpat mambaca kuran. Imbah mambaca barita, bubuhannya tuhuk maitihi iklan tamasuk iklan luwungan gawian. Karna nang dicari adalah urang-urang nang baisian kaahlian, Palui wan kakawalannya hanya kawa mamandirakannya.

“Meski bangaran profesional, kaahliannya tatap tarbatas,” ujar Garbus.

“Bujur haja tabatas tapi sudah ahli banar,” sahut Tulamak.

“Kalu kaya itu kaya apa pandapat ikam badua, apakah baik ahli tapi tabatas kabiasaan atau bisa saraba sadikt tapi banyak nang bisa digawinya,” ujar Palui manyurung pander

“Parlu dipikir dan dijawab Mak ai susurungan Palui itu, kaduduanya pasti ada untung ruginya,”ujar Tulamak.

“Manurut pandapatku baik bujur-bujur ahli, walaupun nang dikuasainya hanya samacam haja. Cuntuhnya, ahli tanaman husus jagung atawa ahli rumbia. Puhun rumbia itu adalah tanaman serba guna. Batang, sagu, palapah dan daunnya samunyaan tapakai. Bila kaahliannya tanaman rumbia maka kada mungkin inya manguasai tanaman puhun gatah,”ujar Tulamak bapander panjang lebar.

“Nah, hebat banar si Tulamak ahli rumbia. Inya tahu banar rumbia karna saban baisukan bahira di jamban di bawah puhun rumbia,”ujar Palui.

“Ikam pang Lui mana nang baik apakah ahli banar tapi sabuting haja atawa saraba sadikit tapi banyak nang bisa digawi,”ujar Garbus manakuni Palui.

“Pangalamanku, justru gawian itu kada parlu ahli banar tapi saraba bisa biarpun cuma sadikit-sadikit,”ujar Palui.

“Napa cuntuhnya Lui?”ujar Tulamak karna bida pandapat wan inya.

“Samalam ikam malamar gawian tukang kalu. Urang mancari ahli masin lalu ikam umpat testing. Ikam kada ditarima karna kada bisa mambaiki masin listrik kalu. Bujur haja ikam bapangalaman maurusi masin tapi masin jahit karna mamarina ikam tukang jahit dan ikam umpat mambantu sidin mamasang kima baju dan maobras,”ujar Palui manumpalak.

“Palui sama haja jua, bapadah saraba bisa. Bulan tadi Palui malamar gawian juru ketik di kantur kabupaten. Inya bapadah ahli mangetik, tapi nyatanya imbah dites akhirnya takipai jua kada ditarima,”ujar Garbus malawanakan.

“Napa sababnya kada diterima Bus?” ujar Tulamak.

“Eee…sakalinya kaahlian Palui kada juru katik tapi tukang katik karna hari-hari gawiannya mangatik burung dipahumaan,” ujar Garbus mamacah rahasia kaahlian Palui.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.