Kisah Abahnya Pintar

palui-44Nangkaya biasanya Palui wan kakawalannya kamarian itu takumpul di gardu runda sambil mahadang dauh maghrib babunyi. Macam-macam nang dipanderakan mulai sual pulitik, sual kariminal, sampai ka sual rumah tangga.

“Dalam hidup barumah tangga ini napa nang paling mahimungakan?” ujar Garbus.

“Kukira nang paling mahimungakan adalah baisi bini nang langkar,” ujar Tulamak.

“Himung bini langkar itu satumat haja Mak ai karna imbah baranakan maka sayangnya bapindah ka anak,” ujar Garbus.

“Kalu aku kada kaya itu Bus ai sebab sampai wayah ini aku sudah baisian anak dua talu ikung tatap haja aku himung dan sayang wan bini,” ujar Tulamak.

“Kalu sudah baranakan dua talu ikung tapi kada himung dan kada sayang lagi wan bini, itu artinya ikam tamasuk lalakian mata karanjang,” ujar Palui umpat manyahut.

“Maksudku sayang dan himung wan bini itu tatap haja ada Lui ai tapi sayang itu sebagian besar sudah tapindah wan anak. Bahkan kada cuma sayang malah dibangga-banggakan,” ujar Garbus.

“Kalu itu aku sapandapat wan Garbus, karna bila kita sudah babini dan sudah baranakan berarti kita adalah lelaki sejati, kada tamanang alias mandul. Wayah ini aku himung banar karna anakku sudah tuntung sakulah TK dan manarusakan ka SD,” ujar Palui.

“Nah pas wan pandapatku tadi Mak ai. Sayang dan himungnya karna anak sudah sakulah, baisukan ma-antar dan siangnya ma-ambili,” ujar Garbus.

“Tapi aku nang rasa sakit hati sadikit adalah anakku itu palajarannya kada maju-maju, rancak kalah wan kakanakan lainnya,” ujar Palui.

“Mungkin karna inya pangulir kaya abahnya,” ujar Tulamak manyindir Palui.

“Kakanakan itu jangan dipaksa jua balajar Lui ai. Nang panting diawasi dan dibimbing supaya timbul semangat dan kamauannya,” ujar Garbus.

“Baisukan tadi anakku itu kutakuni bahkan kusariki kanapa maka nilai rapornya banyak habangnya,” ujar Palui bakisah.

“Lalu napa jawaban anak ikam itu Lui?” ujar Tulamak.

“Jawabannya bujur-bujur manyakitakan hati. Dipadahakannya bahwa nilai rapor kakawanannya itu baik-baik karna abahnya pintar-pintar, sadang inya kada baik karna…,” ujar Palui pina supan kada hakun mangakui bahwa inya bungul.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.