Kisah Bangun Guring Sabiji

palui-39Waktu di kampung bila garing Palui dibarii lungsur akarakaran atawa dadaunan nang ditutuk lalu digiling kaya majum. Bila awak panas atawa panas dalam dinginumi banyu gadang pisang, sadapan haur atawa bisa jua banyu bamban. Alhamdulillah jua imbah diubati kaya itu bisa waras.

Tapi wayah ini Palui sudah hidup di kuta. Bila garing inya manukar ubat di pasar di wadah urang bajual ubat bahalo-halo. Biasanya nang manarik kada ubatnya aja tapi ada main sulapnya, ada lulucuannya.

Waktu inya gagaringan balimanan, bintil-bintil habang di kulimbitnya, urang bajual ubat nang bahalo-halo itu manjualinya ubat nang diminum sabiji satiap imbah bangun guring.

Palui mamatuhi banar pasan tukang ubat itu, maka baisukan bangun guring dimakannya ubat itu sabiji. Habis mandi, babarasih sapida lalu basasapu halaman, inya mangantuk banar lalu naik karanjang mangaruh taguring. Kira-kira pukul sapuluh inya tabangun, dimakannya pulang tabiji lalu inya tulak ka pasar mancari timbaku. Kada lawas di pasar inya bagagas bulik karana mangantuk, sampai di rumah langsung pulang guring.

Siang hari parak pukul dua Palui digarak bininya disuruh sumbayang karana waktu zuhur parak habis. Sabalum sumbahyang inya kaingatan ubatnya, lalu dimakannya pulang sabiji. Kaya itu pulang imbah asyar, inya mangantuk pulang lalu taguring, langsung haja mancari ubatnya lalu manginum pulang sabiji.

Imbah makan malam, Palui tabantai kada kawa bagarak lagi, kauyuhan. Awaknya magin babangkak, muha pina batabal, kulit magin bahabang, kapalanya ngalu, hidung salisma. Galu sarumahan kanapa panyakit Palui pina makin babangat.

Ada urang subalah rumah nang baakal mengiauakan mantri nang ada di kampung. Mantri limbah malihat Palui, sambil mamariksa batakun, “Palui ada mamakan ubat apa?”

Palui malihatakan ubat nang ditukarnya di pasar.

“Barapa biji ikam makan,” ujar mantri pulang.

“Banyak banar mantri-ai. Ujar tukang ubat di pasar, makanlah imbah bangun guring sabiji, imbah bangun guring sabiji, jadi aku manuruti anjurannya,” jawab Palui.

“Ubatnya bujur haja, ubat anti elergi tapi mamakannya kabanyakan. Maksud panjual ubat itu makanlah sabiji imbah bangun guring baisukan, jadi sabiji haja sahari,” ujar mantri.

“Tasalah mamakan ubat ini, kira-kira panjang hajalah umurku,” ujar Palui marista

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.