Kisah Banyu Manggurak

palui-53Salain maadakan acara tujuhbelasan, dikampung Palui ada jua pasar malam. Macam-macam karasminan nang ada di pasar malam, matan rumah hantu, komedi putar, lawan mandi bal gasan kakanakan. Ada jua karasminan tong edan lawan partunjukan akrobat mamakan papaci wan paku.

“Amun nang mamakan paku tu harat pada limbad?” ujar Tulamak kahiranan malihat urang nang wani mamamah paku.

“Nang kaya itu ada jua nang pakai hipnotis, ada jua nang bujuran,” ujar Palui.

“Dasar harat buhannya tu, banyak kajiannya saku Lui lah?” ujar Tulamak

“Amun kaya itu aku gen bisa, cuma aku kada hakun batampai ditangah urang banyak,” ujar Palui baagak.

“Bakaji dimana ikam Lui. Aku kada pacaya,” ujar Tulamak mangaramputakan.

“Amun paku balum suah pang, tapi amun minum banyu manggurak aku sanggup Mak ai,” ujar Palui mamadahi

“Buktiakan Lui, jangan pander haja. Paling muntung lawan ilat ikam luyuh,” ujar Garbus.

“Amun bubuhan ikam handak minta bukti, kita ka warung acil irus,” ujar Palui manggasak. “Tapi bila aku manang, buhan ikam nang mambayari makanan minumanku,” ujar Palui manantang.

“Sadiakan cil, banyu panas nang hanyar manggurak!” ujar Palui manyuruh acil Irus.

“Lajui Lui dimunim!” ujar Tulamak manggasak.

“Sabar dulu… Sabalum maminum banyu panas ini, aku minta syaratnya dahulu,” ujar Palui.

“Napa syaratnya lui ? ujar Garbus.

“Aku maminta ruku sabilah, karna aku harus baruku dahulu,“ujar Palui.

“Kanapa salang baruku dulu Lui?” ujar Tulamak bingung.

“Sabab matan datuku dahulu, sabalum maminum banyu manggurak ini saratnya harus baruku dahulu.”

“Akur, tapi ikam tatap harus manuntum banyu panas itu,” ujar Tulamak wan Garbus maakuri. Lalu palui mahisap ruku ricus-ricus sambil maampul kukusnya. Imbah sapuluh manit hanyar inya tuntung baruku.

“Nah, aku sudah tuntung baruku. Ini lihati aku maminum banyu panas limbah manggurak tadi,” ujar Palui langsung manuntum habis ka banyu panas tadi.

Ranai Tulamak wan Garbus malihat Palui wani maminum banyu hanyar manggurak. “Kaya apa aku kada bakaramput kalu? Banyu panasnya sudah ku tuntum habis sagalasan,” ujar Palui.

“Ikam ni dasar katuju ma-akali kami, manahi punai. Pantas haja wani minum banyu panas amun limbah baruku sabilah, sawat dingin banyunya,” ujar Tulamak wan Garbus kakalahan.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.