Kisah Es Cendol

palui-47Sual bajajalanan, Tulamak kada mau kalah wan Palui. Inya parnah jua tulak ka Jawa. Ngarannya hanyar sakali tarasai tulak, pas bulik ka kampung, Tulamak bakisah banar.

“Wayah madam ka Jawa samalam aku singgah di warung handak nginum, lawas duduk tapi kada dihirani ulih padagangnya,” ujar Tulamak.

“Kanapa maka kada dihiraninya Mak, mungkin katahuannya ikam kada baduit,” ujar Garbus.

“Kanapa maka ikam padahakan aku kada baduit, galang jamku mereknya Rado, pulpenku tiga, salawar jin dan baju kaus nang larang,” ujar Tulamak ba-agak.

“Mungkin karna ikam kada bapadah handak nginum, dikiranya umpat duduk haja,” ujar Garbus malamahi.

“Aku sudah jua baucap dua talu kali tapi padagang itu lihum haja,” ujar Palui.

“Ikam mamasan nginum napa Mak?” ujar Garbus.

“Sasuai kasanganku di banua, aku mamasan es cendol apalagi hari itu panas banar. Es cendol, es cendol…,” ujar Tulamak.

“Biar bapuluh kali ikam manyambat es cendol, es cendol kada cagar diulahakannya” ujar Palui nang bapangalaman tulak ka Jawa.

“Lalu aku harus manyambat napa Lui?” ujar Tulamak.

“Ikam harus manyambat es dawet, es dawet adalah es cendol,” ujar Palui mamadahakan arti parsamaannya.

“Tulamak ini dasar kada hakun balajar bahasa urang sana. Wayah handak naik bica dipadahakan ungkusnya kaleh tengah ewu, lalu ditawarnya dua ribu lima ratus,” ujar Garbus manumpalak kabubungulan Tulamak.

“Kalu aku mangarani cendol itu angka sawalas alias angka sebelas Mak ai,” ujar Palui mambuliki panderan Tulamak sual cendol.

“Kalu disambat angka sabelas makinnya urang kada paham,” ujar Garbus.

“Wajar haja urang kada paham, aku malah kada tamakan,” ujar Palui pina bakirik.

“Napa alasannya Lui, padahal nginuman itu nyaman banar pelepas haus dahaga,” ujar Tulamak.

“Ampun maaf Mak-lah, aku kaingatan wayah ikam badua lagi halus bahwa angka sabelas itu balelehan kaluar matan hidung ikam, hijau balangnya parsis cendol baras. Imbah balelehan lalu ikam pusut, bacalimut hijau sampai ka pipi,” ujar Palui pina manjalujuk.

“Kalu baungkai kisah lagi halus pasti tabanyak ikam panyakitnya Lui ai. Ikam jalan batingkit karna batumbal, rancak bagaru pipikangan paha karna bakurap dan ada jua angka satu balelehan kaluar matan talinga parsis cendol sagu karna ikam bacurik,” ujar Tulamak mambalas sambil batukup hidung.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.