Kisah Iwak H Jua

palui-50Rami banar sakalinya urang manukari nasi kuning lawan lontong di warung bini Palui. Inya dasar harat maulah sambal habangnya, tamasuk kuah lontongnya likat santannya wan barasa banar nyamannya.

Pina banaik rajaki Palui limbah diganii bacari duit oleh nang bini. Amun kakawalannya kaya Garbus wan Tulamak, amun saminggu tu pasti ada haja mancungul di warung bini Palui.

“Barapa sudah hutang buhan ikam, pina racap banar kamari?” ujar bini Palui managur Garbus wan Tulamak nang rahatan mamasan nasi kuning.“Ampunku hanyar lima kali, Garbus saku nang tabanyak,” ujar Tulamak manyahut.

“Aku sama lima kali jua. Kada bacatatan kah ikam umanya jadi manakuni barapa hutang kami?” ujar Garbus batakun jua.

“Ada ai catatannya Bus ai, kami handak mantes buhan ikam haja, jujur kada,” ujar Palui umpat manyahutakan.

“Kami ini kada kaya ikam Lui ai, bisa mangaramput bapadah kada ingat lawan hutang,” ujar Tulamak pina tasinggung.

“Kada salah aku kalu, mun urang kada ingat aku bisa kada ingat jua,” ujar Palui tatawa.

“Pabila babayar? Kasihan kami gasan bamudal,” ujar bini Palui sambil manyurungi minuman teh.

“Limbah cair duit BLT haja Lui lah,” ujar Tulamak.

“Bubuhan ikam ni dasar kaliwatan, urang BLT tu gasan manukar rarampah dapur gasan bini, kadanya gasan bayar hutang nasi kuning sabulanan pang,” ujar bini Palui manumpalak.

“Kada usah bapander hutang lagi, pasti kami babayar kaena, tapi kaena,” ujar Garbus.

“Kami katuju makan nasi kuning disini salain rasanya nyaman, lawan nyaman jua dihutang,” ujar Tulamak mulai manyuap nasi.

“Nah, mulai pulang Tulamak mamander hutang… ujarku tadi ampih kalu bapander. Baik kita makan dahulu… iwaknya kada hurup H barataan lagi kalu,” ujar Garbus mahuhulut Palui sual kajadian samalam.

“Sudah kuganti barataan hurufnya bus ai, tapi husus gasan bubuhan ikam tatap haja iwaknya hurup H,” ujar Palui.“H napa pulang Lui?” ujar Tulamak.

“Hurup H bubuhan ikam tu artinya ‘HUTANG’…. ha…ha,” ujar Palui maangsul. Tapaimbai Garbus wan Tulamak kasadakan mandangar Palui manguya hutang pulang.

Leave a Reply

Your email address will not be published. Required fields are marked *

banjarmasin-bungas * Time limit is exhausted. Please reload CAPTCHA.